गुलरिया(बर्दिया) १० जेठ : बाटो कालोपत्रे तथा नाली निर्माण कार्यमा ढिला सुस्ती गरेको भन्दै स्थानीयबासीले यातायात अवरुद्ध पारेका छन् ।

बर्दियाको मधुवन नगरपालिको लालीबजारदेखि नगरपालिकाको कार्यालयसम्म जाने बाटोको निर्माण कार्य ढिला भएको भन्दै स्थानीयबासीहरुले विरोध स्वरुप बाटो बन्द गराएर विरोध जनाएका हुन् ।

टेण्डर भएको ३ वर्ष भएपनि एक किलो मिटर बाटो कालोपत्रे तथा नाली निर्माण कार्यमा सम्वन्धित निकायले चासो नदिएको भन्दै आफुहरु बाटो बन्द गर्न बाध्य भएको स्थानीयबासीहरुको भनाई छ ।

बर्दियाको गुलरियामा रहेको यादव कन्सक्ट्रक्सनले निर्माणको पाएको हो । ३ वर्ष वितेपनि निर्माण कार्य नभएको भन्दै स्थानीबासीले नगरपालिकालाई पटक–पटक जानकारी गराएका थिए । तर, नगरपालिकाले वास्ता नगरेपछि बाध्य भएर बाटो बन्द गर्नु परेको उनीहरुले बताए ।

विरोध स्वरुप मधुवन नगरपालिकाको लालीबजार देखि प्रगतिबजारसम्म जाने बाटो अवरुद्ध गरिएको हो । सोहि बाटोमानगरपालिकाको कार्यालय पनि रहेको छ । सडक निर्माणमामा भएको ढिलासुस्ती र लापरबाहीका कारण ६ र ८ का वडाबासीले धुलो र हिलोले सास्ती भोग्नु परेको स्थानीय मनकामना टोलका अध्यक्ष ऋषिराज काफले बताए । उनका अनुसार सर्वसाधरणलाई यसक्षेत्र भएर हिँडडुल गर्न सकस भएकोछ । सडक निर्माण कार्य तत्काल सुरु गर्न माग राख्दै नगरपालिकामा ज्ञापन पत्र बुझाएपनि त्यसको सुनुवाई नभएको बताए ।

मधुवन नगरपालिकाका सूचना अधिकारी खिमराज पोख्रेलले सडक निर्माण कार्य रोकिएको बताउँदै नगरपालिकाको योजनाबाट बनिरहेको उक्त सडक र नाली निर्माण कार्य तत्काल सम्पन्न गर्न ठेकेदार कम्पनीलाई जानकारी गराएको बताए ।

मधुवन नगरपालिकाका नगरप्रमुख तेजबहादुर भाटले बाटोमा पर्ने विद्युतका पोल समयमै नहटाइएका कारण निर्माण कार्य रोकिएको बताउँदै २–३ दिनमा विद्युतका पोल हटाई जेठ १५ गते निर्माण कार्य सुरु हुने बताए ।