मंगलबार, असोज ५, २०७८   ०४:१६:१९

धम्बोझी प्रेसिडेन्ट लिगको शीर्ष २ मा


सेतोखरी   2077-12-14

नेपालगन्ज १४ चैत : लुम्बिनी प्रदेशको च्याम्पियन धम्बोझी क्लब, बाँकेले एन्फा प्रेसिडेन्ट लिग– २०७७ मा शनिबार कर्णाली प्रदेशको च्याम्पियन लेकाली युवा क्लबलाई ३–१ ले पराजित गरेको छ । जितसँगै धम्बोझीले लिगको शीर्ष–२ मा पर्न सफल हुदैं राष्ट्रिय लिगका लागि छनोट भएको छ । यस लिगको शीर्ष ४ टोलीले एन्फाले आयोजना गर्ने राष्ट्रिय लिग खेल्न पाउनेछन् ।

शनिबार नेपालगन्ज रंगशालामा धम्बोझीको जितमा बिसन गुरुङले ३० औं मिनेटमा, गौरब बुढाथोकीले ४४ औं मिनेटमा र निसान लिम्बुले ४८ औं मिनेटमा गोल गरेका थिए । लेकालीका संजय धिमालले २४ औं मिनेटमा गोल गरे । खेलमा धम्बोझीका गौरब बुढाथोकी म्यान अफ द म्याच बन्न सफल भए । कर्णाली फुटबल संघ उपाध्यक्ष भरत बहादुर खत्रीले पुरस्कृत गरे ।

धम्बोझीले ६ खेलमा ४ मा जित २ मा हारको सामना गर्दै १२ अंक जोडेको छ । लेकालीले ६ खेलमा ५ मा हार र १ बराबरीमा खेल्दै १ अंकमात्र जोडदै अंक तालिकाको पुछारमा छ ।

एक खेल अगावै सुदूरपश्चिमको स्टार सिटी युवा क्लब कैलाली १३ अंक सहित लिग च्याम्पियन बनिसकेको छ । गण्डकी प्रदेशको त्रिवेणी युवा क्लब ९ अंक सहित तेस्रो स्थानमा छ ।

आईतबार लिगको अन्तिम दिन स्टार सिटीले त्रिवेणी युवा क्लबसँग प्रतिस्पर्धा गर्नेछ । त्रिवेणीले उक्त खेल जितेपछि ‘हेड टू हेड’का आधारमा धम्बोझी शीर्ष–२ मा पर्ने पक्का भएको हो ।

जितपछि शनिबार धम्बोझीका प्रशिक्षक रबिन्द्र श्रेष्ठले लिगको अन्त्य सुखद भएको बताए । उनले भने, ‘च्याम्पियन हुने लक्ष्य थियो । तर, बिचका खेलमा हारको सामना गर्दा पछि समस्या भयो । तर हामी शीर्ष २ मा परेको छौं । यो नै खुसीको कुरा हो ।’ राष्ट्रिय लिगको लागि हामी थप चुनौती थपिएको उनले बताए ।

लेकालीका प्रशिक्षक युवराज शाहीले कर्णाली टिममा थुप्रै सकारात्मक कुरा भएको बताए । उनले भने, ‘हामीले नतिजा राम्रो निकाल्न सकेनौं । तर टिमको क्षमता छ । त्यसलाई निर्खान आवश्यक छ । केहि कुरा मिहिनेत गरे कर्णालीले अन्य प्रतियोगितामा राम्रो गर्न सक्छ ।’

आईतबार लिगको अन्तिम दिनको पहिलो खेलमा सैनिक युवा क्लब झापा र मनकामना युवा क्लब रौतहटबिच प्रतिस्पर्धा हुनेछ । अर्को खेलमा स्टार सिटी र त्रिवेणीबिच प्रतिस्पर्धा हुनेछ ।