नेपालगन्ज १० जेठ : नेपाल पत्रकार महासंघ बाँके शाखाको एम्बुलेन्स खरिद अभियानमा योग समिति नेपालले सहयोग गरेकोछ ।

योग समितिको दोस्रो वार्षिक उत्सवका अवसरमा भेरी अस्पताल परिसरमा सोमबार विहान महासंघको एम्बुलेन्स खरिदका लागि ५ हजार १ सय बराबरको चेक प्रदान गरिएको हो ।

योग समितिका अध्यक्ष गिरिराज भट्टराई लगायत पदाधिकारीको उपस्थितिमा नेपाल पत्रकार महासंघ बाँके शाखाका कार्यसमिति सदस्य भिष्म लोधलाई उक्त सहयोग बापत रकमको चेक हस्तान्तरण गरिएको थियो ।

पत्रकार महासंघको एम्बुलेन्स खरिद सामाजिक कार्य भएकाले सहयोग गरिएको अध्यक्ष भट्टराई बताए ।

यस्तै सो अवसरमा योग समितिले अस्पताल परिसरमा सञ्चालित अन्जनी माता रसोई घरलाई ३५ पेटी पानी प्रदान गरेकोे छ । समितिका अध्यक्ष भट्टराईले रसोई घरका सञ्चालक जितेन्द्र सिंह ठाकुरलाई पानी हस्तान्तरण गरे । सहयोग प्रादन गर्ने समितिलाई रसोई घरले धन्यवाद पत्र समेत प्रदान गरेको योग समितिका कोषाध्यक्ष अम्बिका कोइरालाले जानकारी दिइन् ।

यसैगरि नेपालगन्ज उपमहानगरपालिका वडा नम्रब–४ मा सञ्चालित आइसोलेशन केन्द्रलाई समेत योग समितिले १५ पेटी पानी सहयोग गरेकोछ ।