नेपालगन्ज १६ असोज : बाँकेको राप्ती सोनारी गाउँपालिका वडा नम्बर– १ गाभरमा पाटे बाघले मान्छेलाई घेरेको छ । जंगलमा पशु चौपाया चराउन गएका स्थानीय गोठालाहरुलाई बाघले घेरेका हुन् ।

बाघबाट घेरिएका ब्यक्तिहरु आफ्नो ज्यान जोगाउन अहिले रुखमा चढि बसेको स्थानीय बासिन्दा चन्दा लामाले जानकारी दिईन् । ‘बाघले मान्छेलाई घेरेर राखेका छन्, रुखमा चढेका उनीहरुको उद्धार गरिदिनु पर्यो’ लामाले भनिन् ।

बाँके राष्ट्रिय निकुञ्ज पूर्वी सेक्टरका प्रमुख उत्तम चौधरीले जंगलमा बाघ देखिएको जानकारी आएको र नेपाली सेना सहितको टोली त्यसतर्फ पठाईएको बताए । स्थानीयले चौपाया चराउन गएका ब्यक्तिलाई बाघले घेरेको जानकारी पाएपछि त्यसबारे बुझ्ने काम भइरहेको उनले बताए ।

निकुञ्जका प्रमुख संरक्षण अधिकृत श्याम कुमार साहले यस विषयमा बुझ्न निर्देशन दिईसकेको जानकारी दिए ।