नेपालगन्ज १३ कार्तिक : धारा सातौं नेपालगन्ज म्याराथनको उद्घाटन युवा तथा खेलकुदमन्त्री महेश्वर गहतराज ‘अथक’ले गर्ने भएका छन् । आयोजक क्रियटिभ ह्याण्ड्सका अध्यक्ष टीएस ठकुरी, पत्रकार जनक नेपाल र नेपाली क्रिकेट टीमका पूर्वकप्तान एलबी क्षेत्रीले युवा तथा खेलकुद मन्त्रालयमै पुगेर मन्त्री अथकलाई भेटेर प्रतियोगिताको उद्घाटन गर्ने तय गरेका हुन् ।

बाँके जिल्ला निवासी मन्त्री अथकले आफ्नै ठाउँमा हुँदै आएको राष्ट्रियस्तरको प्रतियोगिता उद्घाटन गर्न पाउदा आफू उत्साहित भएको प्रतिक्रिया दिएका छन् । नेपालगन्ज म्याराथन मंसीर ४ गते शनिबार हुँदैछ । नेपाल सरकार र तत्कालिन विद्रोही माओवादीका बीचमा मंसीर ५ गते भएको विस्तृत शान्ति सम्झौताको दिनलाई स्मरण गर्न प्रत्येक वर्ष नेपालगन्जमा म्याराथन हुने गर्दछ । यसपाली शनिबार पार्नका लागि घोषित मिति भन्दा एक दिनअघि म्याराथन आयोजना गरिएको छ ।

नेपालगन्ज म्याराथनको पहिलो संस्करणको उद्घाटन तत्कालिन गृहमन्त्री शक्ति बस्नेतले गरेका थिए । सातौं संस्करण त्यही पार्टीबाट युवा तथा खेलकुद मन्त्री बनेका अथकले गर्दैछन् । माओवादी विस्तृत शान्ति सम्झौताको एउटा पक्ष हो ।

सात हजार मानिसलाई दौडाउने योजना अनुसार नेपालगन्ज म्याराथनको तयारी तीब्रगतिमा भइरहेको छ । नेपालगन्ज म्याराथनको रौनक बढाउन महानायक राजेश हमाल आउँदै छन् । राष्ट्रियस्तरका सबै र विदेशबाटसमेत केही धावक नेपालगन्ज म्याराथनमा दौडिदै छन् । सातै प्रदेशका खेलाडी नेपालगञ्ज म्याराथनमा सहभागी हुँदै छन् । क्रियटिभ ह्याण्डसका अध्यक्ष ठकुरीले नेपालगन्ज म्याराथनमा स्थापित प्रतियोगिता भएकाले सबै राष्ट्रिय खेलाडीको सहभागिता रहने बताए ।

‘युवा तथा खेलकुदमन्त्री अथकले समय दिनु भएको छ । महानायक राजेश हमाल आउँदै हुनुहुन्छ, यसले नेपालगन्ज म्याराथनको रौनक अझ बढाएको छ, अध्यक्ष ठकुरीले भने, नेपालगन्जको पहिचान बढाउने नेपालगन्ज म्याराथनलाई अझ उचाईमा पु¥याउन जिल्लावासीको एकताको खाँचो छ ।’

फूल र हाफ म्याराथनमा सबै राष्ट्रिय खेलाडी दौडिदै छन् । विधागत दौडमा भविष्यका धावकहरु र विद्यार्थीहरुको उत्साहपूर्ण सहभागिता देखिदैछ । ८ देखि १२ वर्ष उमेरका बच्चाहरु, कर्पोरेट र वाकाथनमा शहरका गन्यमान्य व्यक्तित्वले भाग लिदैछन् । नेपालगन्ज म्याराथनमा अपाङ्गता भएकाहरुले पनि प्रतिभा देखाउने मौका पाउदै आएका छन् ।

नेपालगन्ज म्याराथनलाई भब्य र सब्य बनाउन धारा तेल, आशिर्वाद पेन्टस्, शिखर प्लाई, राष्ट्रिय बाणिज्य बैंक, फोन पेको साथ र सहयोग रहेको छ ।

नेपालगन्ज म्याराथनमा गतवर्ष कोरोनाले गर्दा ठूलो उपस्थिति गराइएन । यद्यपि, गतवर्षको नेपालगञ्ज म्याराथन ऐतिहासिक भएको थियो । टोकियो ओलम्पिकको छनोटको रुपमा नेपालगन्ज म्याराथनलाई लिइएको थियो । त्यसअघि तीन हजार सात जना म्याराथनमा दौडिएका थिए । अध्यक्ष ठकुरीले गतवर्ष ईच्छा भएकाहरुलाई सहभागी गराउन नसकेको र यसपाली सात हजारलाई नेपालगञ्जको सुर्खेतरोडमा दौडाउने बताए ।