नेपालगन्ज २१ माघः बाँकेमा ८३ प्रतिशत बालबालिकाले मोडर्ना खोप लगाएका छन् । कोरोना विरुद्धको मोडर्ना खोप सञ्चालन गरेको तीन दिनमा लक्षित संख्याको ८३ प्रतिशतले खोप लगाएका हुन् ।

बाँकेमा ६९ हजार ८ सय ३७ जना बालबालिकालाई खोप लगाउने लक्ष्य रहेकोमा बुधबार, विहिबार र शुक्रबार गरी तीन दिनमा ५७ हजार ९ सय ७१ जनाले मोडर्ना खोप लगाएको स्वास्थ्य कार्यालय बाँकेले जनाएको छ । यसमा २८ हजार ७ सय ८९ जना छात्रा र २९ हजार १ सय ८२ छात्र छन् । खोप फोकल पर्सन नरेश श्रेष्ठका अनुसार अब खोप लगाउन बाँकी संख्या ११ हजार ८ सय १७ छ ।

बाँकेका ४३३ विद्यालयका १२ देखि १७ वर्ष उमेर समूहका बालबालिकालाई २६९ वटा खोप केन्द्रबाट खोप लगाइएको थियो । खोप प्रगति सबैभन्दा बढी कोहलपुर नगरपालिका र कम नरैनापुर गाउँपालिकामा छ । कोहलपुरका लक्ष्य भन्दा बढी १२९ प्रतिशत र नरैनापुरका ३८ प्रतिशत बालबालिकाले खोप लगाएका छन् ।

यस्तै राप्तीसोनारीमा ८४, खजुरा ९३, नेपालगन्ज ७५, बैजनाथ ९८, डुडुवा ५६ र जानकीका ५७ प्रतिशत लक्षित बालबालिकाले खोप लगाएका खोप फोकल पर्सन श्रेष्ठले जानकारी दिए । बाँकेमा स्कुले बालबालिकालाई खोप लगाउन माघ १९ र २० गते खोप कार्यक्रम चलाइएको थियो । भने शुक्रबार पनि खोप अभियन चलाइएको हो । विद्यालयमै खोप केन्द्र राखेर खोप कार्यक्रम सञ्चालन गरिएको हो ।

यसैबीच, शुक्रबारको तथ्यांक अनुसार राप्तीसोनारीमा थप ५ छात्रा ८ छात्र गरि १३ जना, कोहलपुर ४२१ छात्रा र ३८९ छात्रा गरि ८१०, बैजनाथमा ८६८ छात्रा र १०६२ छात्र गरि १९३० जना, खजुरामा ३३० छात्रा र २८६ छात्र गरि ६१६ जना, जानकीमा ३१० छात्रा र ३२२ छात्र गरि ६३२ जना, नेपालगन्जमा ५३ छात्रा र ७४ छात्र गरि १२७ जना, डुडुवामा १९६ छात्रा र २४४ छात्र गरि ४४० जना तथा नरैनापुरमा ११३ छात्रा र १०२ छात्र गरि २१५ जना सहित कुल २२९६ छात्रा र २४८७ छात्र गरि ४७८३ जनाले खोप लगाएकाछन् । शनिबार पनि खोप लगाइने स्वास्थ्य कार्यालय बाँकेले जनाएकोछ ।

थप समाचार

कोभिडकाबीच बाँकेका ‘विद्यालय खुले’, जन्मदर्ता लिएर विद्यार्थी आए