नेपालगन्ज १४ चैत्र : स्थानीय तहको निर्वाचन २०७९ वैशाख ३० गते हुँदैछ । देशभर एकै चरणमा निर्वाचन हुने भएको हो । निर्वाचन आयोगका अनुसार आगामी स्थानीय निर्वाचन नेपालको निर्वाचन इतिहासमै सबैभन्दा बढी मतदाता रहेको निर्वाचन हुनेछ ।

आयोगले आईतबार सार्वजनिक गरेको तथ्याङ्कअनुसार वैशाखमा हुने स्थानीय निर्वाचनमा एक करोड ७७ लाख ३३ हजार ७२३ मतदाता सहभागी हुन पाउने छन् । यसअघि नेपालमा सम्पन्न भएका निर्वाचनमा सबैभन्दा बढी मतदाता २०६४ सालको संविधानसभा निर्वाचनमा रहेको थियो । सो निर्वाचनमा कुल मतदाता संख्या एक करोड ७६ लाख ११ हजार ८३२ रहेको थियो ।

आउँदो स्थानीय तहको निर्वाचनको लागि नाम लेखाएका मतदातामध्ये ८९ लाख ९२ हजार १० जना पुरुष, ८७ लाख ४१ हजार ५३० जना महिला र १८३ जना अन्य रहेका छन् । आयोगले स्थानीय तह निर्वाचन सम्पन्न गर्न देशभर १० हजार ७५३ मतदान स्थलअन्तर्गत २१ हजार ९५५ मतदान केन्द्रहरु राख्ने निर्णय गरेको छ ।

आगामी स्थानीय निर्वाचनमा सबैभन्दा बढी मोरङमा ७ लाख १५ हजार २२३ जना मतदाता रहेका छन् । सबैभन्दा कम मतदाता संख्या मनाङमा ६ हजार ४९६ रहेका छन् ।

यता बाँकेमा सबै भन्दा बढि मतदाता नेपालगन्जमा रहेकाछन् । बाँकेको ८ पालिकामध्ये सबैभन्दा बढि ८१ हजार ७ सय ९४ मतदाता नेपालगन्जमा रहेकाछन् । जहाँ ४३ हजार १ सय ११ पुरुष र ३८ हजार ६ सय ७९ महिला रहेकाछन् ।

यस्तै जिल्लामै सबैभन्दा कम मतदाता नरैनापुर गाउँपालिकामा मतदाता रहेकाछन् । नरैनापुरमा कुल १८ हजार ५ सय ९९ मतदाता रहेकाछन् । जहाँ १० हजार ९ सय २० पुरुष र ७ हजार ६ सय ७९ महिला रहेकाछन् ।

यस्तै कोहलपुर नगरपालिकामा २६ हजार ८ सय १४ पुरुष र २९ हजार ९ सय ८२ महिला गरि कुल ५६ हजार ७ सय ९७ जना, खजुरा गाउँपालिकामा १८ हजार ७६ पुरुष र १९ हजार १ सय ८७ महिला गरि कुल ३७ हजार २ सय ६४ जना, जानकी गाउँपालिकामा १२ हजार ५ सय ५२ जना पुरुष र १० हजार २ सय ७७ जना महिला गरि कुल २२ हजार ८ सय २९ जना मतदाता रहेका छन् ।

यसैगरी डुडुवा गाउँपालिकामा १२ हजार ६ सय ४० पुरुष र ९ हजार ६ सय १५ जना महिला गरि कुल २२ हजार २ सय ५५ जना, बैजनाथ गाउँपालिकामा २१ हजार १ सय ७१ पुरुष र २३ हजार ९ सय ५२ महिला गरि कुल ४५ हजार १ सय २३ जना तथा राप्तीसोनारी गाउँपालिकामा २२ हजार ६५ पुरुष र २२ हजार ७ सय ४६ महिला गरि कुल ४४ हजार ८ सय १२ जना मतदाता रहेकाछन् ।

जिल्ला निर्वाचन आयोगका अनुसार बाँकेका ८ वटा पालिकामा एक सय ३६ मतदान स्थल रहेको छ भने ३ सय ७९ मतदान केन्द्र कायम गरिएकोछ ।

पालिकाअनुसार हेर्दा सबै भन्दा बढि मतदान स्थल र मतदान केन्द्र नेपालगन्ज उपमहानगरपालिका रहेकोछ । नेपालगन्ज उपमहानगरपालिकामा मतदान स्थल ३४ र मतदान केन्द्र ९४ रहेकोछ ।

बाँकेमा सबैभन्दा कम नरैनापुर गाउँपालिकामा मतदान स्थल र मतदान केन्द्र रहेकाछन् । यहाँ १२ वटा मतादन स्थल रहँदा २४ वटा मतदान केन्द्र रहेकोछ ।
यस्तै कोहलपुर नगरपालिकामा १६ मतदान स्थल र ६२ वटा मतदान केन्द्र, खजुरा गाउँपालिकामा १६ मतदान स्थल र ४३ मतदान केन्द्र तथा जानकी गाउँपालिकामा १२ मतदान स्थल र २७ मतदान केन्द्र रहेकाछन् ।
यसैगरी डुडुवा गाउँपालिकामा १२ मतदान स्थल र २६ मतदान केन्द्र, बैजनाथ गाउँपालिकामा १६ मतदान स्थल र ५२ मतदान केन्द्र तथा राप्तीसोनारी गाउँपालिकामा १८ मतदान स्थल र ५१ मतदान केन्द्र रहेकाछन् ।

बाँकेका ११२ मतदान स्थल संवेदनशील

बाँकेका ८ पालिकामा कायम गरिएका १३६ मतदान स्थलमध्ये ११२ मतदान स्थल अति संवेदनशील र २४ वटा मतदान स्थललाई संवेदनशील तोकिएको छ ।

जिल्ला प्रहरी कार्यालय बाँकेका प्रहरी प्रमुख एवं प्रहरी उपरीक्षक श्यामकृष्ण अधिकारीका अनुसार भौगोलिक अवस्था र खुला सीमाना लगायतका कारण सुरक्षा संवेदनशीलता भए पनि जिल्लाको सुरक्षा प्रहरी नियन्त्रणमा रहेकोछ ।

स्थानीय तहको निर्वाचनका समयमा मतदान स्थल तथा मतदान केन्द्रसम्म जानको लागि बाटोको अवस्था, मतदान स्थल तथा केन्द्रको सुरक्षाको अवस्था र मतदाताको मनोभावना बुझेर निर्वाचन लक्षित सुरक्षा रणनीतिसहित अघि बढेको उनले बताए ।

उनले निर्वाचनलाई अत्यन्त मर्यादित र भयरहित तरिकाले सम्पन्न गर्नको लागि सुरक्षा व्यवस्था बलियो बनाउन कुनै कसर बाँकी नराख्ने पनि बताए । निर्वाचन लक्षित जिल्लाको सुरक्षालाई लिएर बाँके प्रहरी हाई अलर्टमा रहेकोछ ।

यसका लागि ७५ जनाको रिजर्भ फोर्स २४ सै घण्टा ‘हाई अलर्ट’मा रहनेछ । उनका अनुसार जिल्ला प्रहरी कार्यालय बाँके, ईलाका प्रहरी कार्यालय कोहलपुर र ईलाका प्रहरी कार्यालय भगवानपुरमा २५–२५ जना गरी ७५ जनाको रिजर्भ फोर्स ‘हाई अलर्ट’मा राखिनेछ ।

यसका अलावा निर्वाचन अवधिमा नेपाल–भारतका सुरक्षाकर्मीको संयुक्त गस्ती हुनेछ । बाँकेको ६५ किलोमिटर भू–भाग भारतसँग खुला सीमा जोडिएको छ ।

थप समाचार

बाँकेका ८ स्थानीय तहमा तोकिए निर्वाचन अधिकृत

बाँकेमा १६८६ म्यादी प्रहरीका लागि ५८०२ जनाको आवेदन

एक करोड ७७ लाख ३३ हजार ७२३ मतदाता

बाँकेका ११२ मतदान स्थल संवेदनशील