नेपालगन्ज १३ चैत्र : आगामी वैशाख ३० गते हुने स्थानीय तह निर्वाचनलाई लक्ष्य गरी बाँकेमा खुला गरिएकोे म्यादी प्रहरीमा कोटा भन्दा ४११६ बढिले आवेदन दिएकाछन् ।

जिल्ला प्रहरी कार्यालय बाँकेका प्रवक्ता एवम डीएसपी मधुसुदन न्यौपानेका अनुसार जिल्लामा कुल १६८६ जनाको कोटा निर्धारण गरिएपनि कोटाभन्दा बढि ४११६ जनाले आवेदन दिएकाहुन् ।

म्यादी प्रहरीका लागि यही चैत ६ गतेदेखि ११ गतेसम्म आवेदन खुला गरिएको थियो । ६ दिनमा कुल ५ हजार ८०२ जनाले फाराम भरेको न्यौपानेले जानकारी दिए ।

१८ वर्ष पुरा भएका ५४ वर्ष ननाघेका नागरिकले म्यादीमा आवेदन दिएकाछन् । तर, म्यादी प्रहरी र भूतपूर्व सुरक्षाकर्मीलाई प्राथमिकतामा राखिएको डिएसपी न्यौपानेले बताए ।

उनका अनुसार यही चैत्र १५ गतेबाट म्यादी प्रहरी छनोट शुरु हुनेछ । यसको अन्तिम नतिजा चैत्र २२ गते प्रकाशन गरिनेछ । छनोट हुनेलाई चैत्र २८ गतेबाट एक साता तालिम दिएर खटाइनेछ ।

म्यादी प्रहरी हुन गृहिनीदेखि स्नातकसम्म पढेकाले आवेदन दिएका छन् । जिल्ला प्रहरी कार्यालयमा ४० दिने जागिरका लागि तँछाडमछाड गरेर उनीहरुले फाराम भरेका थिए । रोजगारीका लागि ठूलो भीड भएपछि प्रहरीले टोकन प्रणालीबाट फाराम संकलन गरेको थियो ।

निर्वाचनमा खटिने म्यादी प्रहरीको कार्यावधि बढीमा ४० दिनको तोकिएको छ भने उनीहरूको तलब नेपाल प्रहरीको जवान सरह अर्थात् आधारभूत तलब मासिक २२ हजार ६८० रुपैयाँ हुनेछ ।

४० दिनको कुल तलब बैंक खातामा ३० हजार २४० रुपैयाँ तथा खाद्यान्न बापत ७ हजार २ सय, पोशाक तथा अन्य सामान खरिद गर्ने गरी ६ हजार गरी कुल ४४ हजार ४ सय ४० रुपैयाँ प्राप्त गर्नेछन् ।

यसरी थोरै समय भएपनि रोजगार बन्न पाउने आशाले पनि म्यादी प्रहरीमा भर्ना हुन चाहनेको संख्या उच्च रहेको बाँके प्रहरी प्रवक्ता न्यौपानेले बताए ।

न्यौपानेका अनुसार बाँकेमा १३६ वटा मतदान केन्द्र र करिब ६९ किमि खुला सीमामा सुरक्षाका लागि आवश्यक जनशक्ति पुरा गर्न म्यादी प्रहरी खटाइनेछ ।

थप समाचार

बेरोजगारीको डरलाग्दो दृष्य, ४० दिने जागिरेमा युवाको भीड