नेपालगन्ज १६ चैत्र : आसन्न स्थानीय तहको निर्वाचनलाई मध्यनजर गर्दै बाँके प्रशासनले हातहतियार बुझाउन निर्देशन दिएकोछ ।

आगामी वैशाख ३० गते हुने स्थानीय तहको निर्वाचनलाई लक्षित गर्दै बाँके प्रशासनले यस्तो निर्देशन दिएको हो ।

स्थानीय तहको निर्वाचन भयरहित र विश्वसनीय बनाउन भन्दै जिल्ला प्रशासन कार्यालय बाँकेले वैध तथा अवैध हातहतियार निर्देशन दिइएको बाँकेका प्रमुख जिल्ला अधिकारी सूर्यबहादुर खत्रीले बताए ।

गृह मन्त्रालयको निर्देशन बमोजिम हातहतियार बुझाउन सूचना जारी गरिसकेको बताउँदै प्रजिअ खत्रीले जिल्लामा इजाजत प्राप्त र बिना इजाजतका हातहतियार नजिकैको प्रहरी ईकाइहरुमा चैत्र मसान्तभित्र स्वतःस्फूर्त रूपमा बुझाउन निर्देशन दिएको बताए ।

प्रमुख जिल्ला अधिकारी खत्रीका अनुसार इजाजत पाएर र बिना इजाजतका अवैध रूपमा राखिएका हातहतियार नजिकको प्रहरी इकाइमा बुझाउन सकिने छ ।

निर्धारित समयभित्र नबुझाई अटेर गरेको पाइएमा त्यस्ता व्यक्तिको हातहतियार खोजतलास गरी कानूनबमोजिम कारबाही गरिने बाँके प्रशासनले जनाएको छ ।

‘हामीले सूचना जारी गरि आफूलाई पाएक पर्ने प्रहरी मातहतका कुनै पनि इकाइमा बुझाउन आग्रह गरेकाछौं,’ सेतोखरीसंग कुरा गर्दै प्रजिअ खत्रीले अगाडी थपे–‘निर्वाचनका समयमा वैद्य तथा अवैद्य हतियारको दुरुपयोग हुनसक्छ । त्यही अनुसार सूचना सर्कुलर गरेकाछौं । समय अवधिभित्र नबुझाए भेटिए कारबाही गरिनेछ ।’

प्रजिअ खत्रीले सेतोखरीलाई भने ‘इजाजत प्राप्त हातहतियार स्थानीय तहको निर्वाचनपछि इजाजत प्राप्त ब्यक्तिलाई फिर्ता गरिने छ । बिना इजाजत तोकिएको समयमा हातहतियार नबुझाएमा खानतलासी गरेर कारबाही गरिनेछ ।’

निर्वाचन विश्वसनीय, सुरक्षित र भयरहित वातावरण बनाउन वैध र अवैध सबै प्रकारका हतियार सूचना जारी गर्दै बुझाउन लगाइएको प्रजिअ खत्रीले बताए ।