नेपालगन्ज ५ जेठ : भारतीय नागरिक पंकजको समुहले नेपालगन्जमा गुण्डागर्दी देखाएकोछ । नेपालगन्जको सुर्खेतरोडमा रहेको स्टारलाईट क्यासिनोमा पुगेर पंकजको समुहले गुण्डागर्दी देखाउँदै बबाल मच्चाएकोछ । भारतीय गाडीमा आएको उक्त समुहले स्टारलाईट क्यासिनोमा बुधबार बबाल मच्चाएको हो ।

पंकज नाम गरेका भारतीय ब्यक्तिको नेतृत्वमा आएको समुह क्यासिनोमा पुगि गुण्डागर्दी शैलीमा बबाल मच्चाएको सीसी क्यामेरामा कैद भएको भिडियोले देखाएकोछ । भिडियोमा खिचिएको दृष्य अनुसार, उक्त समुह गाडीबाट ओर्लन्छ र क्यासिनो भित्रबाट विक्की नाम गरेका ब्यक्तिलाई बोलाई एक्कासी त्यही पिट्न थाल्छ ।

पंकजको समुहले विक्कीलाई केहिबेर पिटेर ‘अपहरण शैली’मा गाडीमा राखि लैजान्छ । त्यतिमात्र होइन । पंकजको समुहले गाडीमा अन्यत्र लगि बेस्सरी पिटेर प्रहरीकोमा लगेर बुझाँउछ ।

पिटाइ खाने विक्किले न्याय पाउनुको साटो उल्टै बाँके प्रहरीकोमा थुनिन्छन् । वडा प्रहरी कार्यालय नेपालगन्जमा राखिएका विक्कीलाई जिल्लाको निर्देशनमा विहीबार जिल्ला प्रहरी कार्यालय बाँके पठाइएको वडाका प्रहरी निरीक्षक रिपेन्द्र सिंहले सेतोखरीलाई जानकारी दिए ।

जब घटना विवरण थाहा पाइसकेपछि निरीक्षक सिंहले पिट्ने समुहलाई खोज्न थाले अनि उक्त समुहका पंकजसहितको टोली वडा प्रहरीमा नआई जिल्ला प्रहरी कार्यालय बाँकेमा हाजिर भयो ।

भारतीय नागरिक पंकजले नेपालगन्ज सुर्खेतरोड एसविआई बैंक नजिक डान्स क्लब खोलेकाछन् । पिट्ने समुह पंकज जिल्ला प्रहरी कार्यालय बाँकेसंग नजिक रहेको घटना विवरणले देखाउँछ । किनभने, पिट्ने समुह थुनिनुको साटो सीसी क्यामेराले खिचेको भिडियो हुँदाहुँदै पनि पीडित पिटाई खाने विक्की प्रहरीको खोरमा थुनिएकाछन् ।

जिल्ला प्रहरीसंग नजिक रहेका पंकजले आफ्नो पावर शो गरेको र पिट्ने मान्छेलाई कारबाही नगरेर पिटाई खानेलाई प्रहरीले थुनेको प्रत्यक्षदर्शीहरुले बताएकाछन् ।