नेपालगन्ज २८ साउनः प्रतिनिधी सभा र प्रदेश सभाको निर्वाचन तोकिएपछि बाँकेको क्षेत्र नम्बर–३ मा उम्मेदवारबारे चर्चा चुलिएकोछ । सरकारले आगामी मंसिर ४ गते प्रतिनिधी सभा र प्रदेश सभाको निर्वाचन एकै चरणमा गर्ने घोषणा गरिसकेको छ । सरकारको घोषणा पश्चात निर्वाचन आयोगले चुनाव गराउने तयारी अगाडी बढाइसकेको छ ।

आसन्न प्रतिनिधी सभा निर्वाचनका लागि क्षेत्र नम्बर–३ बाट काँग्रेसका पुराना र नयाँ अनुहारले आकांक्षा देखाएका छन् । उक्त क्षेत्रबाट प्रतिनिधी सभा निर्वाचनका लागि नेता मेघराज ओली, बादशाह कुर्मी र लक्ष्मीनारायण शाहले उम्मेदवार बन्ने आकांक्षा देखाएका हुन् ।

क्षेत्र नम्बर–३ बाट हाल काँग्रेसको महासमिति सदस्य समेत रहेका ओलीले यसपटक प्रतिनिधी सभाका लागि तीब्र आकांक्षा देखाएका छन् । काँग्रेसका जिल्लादेखी केन्द्रिय स्तरका नेताले समेत चुनाव लड्न उनलाई सुझाव दिएका छन् ।

यस्तै सोही क्षेत्रबाट चुनाव लड्ने पार्टीका महाधिवेशन प्रतिनिधी कुर्मी र महासमिति सदस्य तथा हाल काँग्रेसका जिल्ला सदस्य रहेका शाहले पनि आकांक्षा राखेका छन् । उनीहरु पनि आफ्नो तयारी स्वरुप भेटघाटमा ब्यस्त छन् ।

नेता कुर्मीले पटक–पटक अवसर पाउँदै आएका छन् । शाहले पनि एक पटक अवसर पाईसकेका छन् । काँग्रेसले नेता कुर्मीलाई बाँकेबाट २०६४ र २०७० सालमा दुई पटक संविधान सभा सदस्य बनाएको थियो । २०७४ सालको निर्वाचनमा पनि पार्टीले कुर्मी र शाहलाई आफ्नो उम्मेदवार बनाएको थियो । उक्त क्षेत्रबाट प्रतिनिधी सभा निर्वाचनका लागि कुर्मी र प्रदेश सभा–३ ‘ख’ बाट शाह चुनाव लडेका थिए । तत्कालिन बाम गठबन्धनका तर्फबाट कुर्मीलाई एमालेका नन्दलाल रोकाय र शाहलाई बाबुराम गौतमले पराजित गरेका थिए ।

नेता ओली यस्तो ब्यक्ति हुन्, जो विगत तीन दशकभन्दा बढी समयदेखी काँग्रेसको भातृ संगठन नेपाल बिद्यार्थी संघ, नेपाल प्रेस युनियन हँुदै नेपाली काँग्रेसको मुल राजनीतिमा निरन्तर सक्रिय हुँदै आएका छन् । तर, पार्टीले अहिलेसम्म उनलाई कुनैपनि अवसर दिन सकेको छैन ।

२०७४ सालको भन्दा अहिले राजनीतिक परिस्थितीमा फेरबदल भइसकेको छ । चुनावमा बाम गठबन्धन गरेर पार्टी एकता समेत गरेका माओवादी र एमाले अलग भइसकेका छन् । आसन्न प्रतिनिधी सभा र प्रदेश सभा निर्वाचनका लागि सत्तारुढ दल नेपाली काँग्रेस, माओवादी केन्द्र, जनता समाजवादी पार्टी (जसपा), नेकपा (एकिकृत समाजवादी) र राष्ट्रिय जनमोर्चाबीच चुनावी तालमेल गर्ने सहमती भइसकेको छ । सत्तारुढ गठबन्धनका तर्फबाट कुन दलले कहाँ पाउने भन्ने निश्चित नभएपनि पार्टीभित्र उम्मेदवार बन्न नेताहरुको आकांक्षा भने तिब्र देखिन्छ ।

बाँके, क्षेत्र नम्बर–३ मा काँग्रेसका सह–महामन्त्री किशोरसिंह राठौर चुनाव लड्न आउने चर्चा चलेपनि अहिलेसम्म उनले कतै मुख खोलेका छैनन् । तर, काँग्रेस स्रोतका अनुसार नेता राठौर बाँकेमा चुनाव लड्न आउने सम्भावना कम देखिएको छ । राठौरले आफ्नै गृहजिल्ला बर्दियामा चुनाव लड्ने सोँच बनाएको उनी निकट नेता बताउँछन् । चुनाव नजिक आउँदा काँग्रेसभित्र टिकटका लागि होडबाजी नै चल्ने गरेको छ ।

पार्टीबाट अवसर पाउने ब्यक्तिले सधैं अवसर पाउने र नपाउने ब्यक्ति नपाउने सधैं बञ्चित हुने काँग्रेसभित्र मौलाएको बेथिती हो । २०७९ सालको प्रतिनिधी सभा निर्वाचनमा भने सत्तारुढ दल काँग्रेसले कस्लाई उम्मेदवार बनाउँछ, त्यो भने काँग्रेस कार्यकर्ता मात्रै नभएर बाँके क्षेत्र नम्बर–३ का सिंगो बासिन्दाले चासोका साथ हेरिरहेका छन् ।

थप समाचार

बाँके क्षेत्र नम्बर– २ मा काँग्रेस बलियो

बाँके क्षेत्र नम्बर–१ मा गठबन्धनको चेपुवामा काँग्रेस

बाँकेमा बढ्यो चुनावी सरगर्मी, टिकटका लागि ‘गठबन्धन बाधक’