नेपालगन्ज १ भदौ : बाँकेमा दुई जनाको शंकास्पद मृत्यु भएकोछ । बाँकेको कोहलपुर र नेपालगन्जमा दुईजनाको शंकास्पद मृत्यु भएको हो ।
जिल्ला प्रहरी कार्यालय बाँकेका अनुसार बाँकेको कोहलपुरस्थित सामुदायिक वनमा एक जना किशोर मृत फेला परेका छन् । भने नेपालगन्जको आरम्भ पुर्नस्थापना सुधार केन्द्रमा रहेका एक ब्यक्तिको मृत्यु भएको हो । दुबैको मृत्यु शंकास्पद रहेको बाँके प्रहरीले जनाएकोछ ।
कोहलपुर नगरपालिका–७ स्थित आरती सामुदायिक वनभित्र जानकी गाउँपालिका–६ का १६ वर्षीया शिव लोनिया मृत अवस्थामा फेला परेको ईलाका प्रहरी कार्यालय कोहलपुरका प्रमुख डिएसपी ऐनबहादुर मल्लले जानकारी दिए । बुधबार विहान करिब १० बजेतिर बालक मृत अवस्थामा फेला परेको जानकारी पाउने वित्तिकै पुगेको प्रहरी टोलीले शव पहिचान लगत्तै अनुसन्धान थालेको छ ।
घटनालाई गम्भीर रुपमा लिएको मल्लले बताए । उनले एक ठाँउमा हत्या गरि अर्को स्थानमा शव फालेको अवस्थामा भेटिएको बताए । हत्या आशंकामा प्रहरीले चार जनालाई पक्राउ गरेको छ ।
दाउरा लिन वनमा गएको बेला रुखको हांगाले लागेर भतिजाको मृत्यु भएको सँगै जंगल गएका काकाले बयान दिए पनि हत्या भएको आशंकामा प्रहरीले अनुसन्धान थालेको डिएसपी मल्लले बताए ।
साथमा जंगल गएकाहरुलाई नियन्त्रणमा लिएर अनुसन्धान थालेको उनले बताए । ‘रुखको हांगा लागेर मृत्यु भएको हो की हत्या गरिएको हो भन्ने विषयमा अनुसन्धान भइरहेको छ । थप कुरा अनुसन्धानबाट खुल्ने छ,’ उनले बताए ।
यसैबीच, नेपालगन्ज उपमहानगरपालिका–९, शान्तिनगरस्थित आरम्भ पुनस्र्थापना केन्द्रमा भर्ना भएका लागूऔषध प्रयोगकर्ताको मृत्यु भएको छ ।
बढैयाताल गाउँपालिका– ८ का ५२ वर्षीय रमेश अधिकारीको मृत्यु भएको बाँके प्रहरी प्रवक्ता समेत रहेका प्रहरी नायव उपरीक्षक रामप्रसाद घर्तीमगरले जानकारी दिए । सुधार केन्द्रमा रहेका उनको स्वास्थ्यमा खराबी देखिएपछि भेरी अस्पताल लैजाने क्रममा उनको बाटोमै मृत्यु भएको जानकारी आएको उनले बताए ।
उनी एक हप्ता अघि मात्र पुनस्र्थापना केन्द्रमा भर्ना भएका थिए । अधिकारीको मृत्यु शंकास्पद देखिएको भन्दै थप अनुसन्धान भइरहेको उनले बताए । मृतकको भेरी अस्पतालमा पोष्टमार्टम गरि परिवारको जिम्मा लगाइएको प्रहरीले जनाएको छ ।