नेपालगन्ज ४ भदौ : नेपालगन्जबाट काठमाण्डौं लैजान तयारी अवस्थामा रहेको ठूलो मात्राको लागुऔषधसहित एक जनालाई नियन्त्रणमा लिइएकोछ ।

जिल्ला प्रहरी कार्यालय बाँकेले नेपालगन्जको विमानस्थलबाट लागुऔषध ब्राउनसुगर (खैरो हिरोईन) सहित कोहलपुरका रोहन शाहलाई नियन्त्रणमा लिएको हो ।

नेपालगन्जबाट काठमाण्डौं जाने विमानबाट लागुऔषध ब्राउनसुगर लैजना लागिएको गोप्य सूचना पाएको प्रहरीले रोहनलाई नेपालगन्ज विमानस्थलबाटै नियन्त्रणमा लिएको छ ।

नेपालगन्ज विमानस्थलको यात्रु कक्षमा आराम गरिरहेका बाँके कोहलपुर नगरपालिका वडा नम्बर–११ बस्ने २५ वर्षिय रोहन शाहलाई ६४ ग्राम ७५० मिलिग्राम ब्राउन सुगरसहित पक्राउ गर्न सफल भएको बाँके प्रहरीले जनाएकोछ ।

जिल्ला प्रहरी कार्यालय बाँकेका अनुसार रोहनलाई शनिबार दिउँसो सवा २ बजे नियन्त्रणमा लिइएको हो । उनी नेपालगन्जबाट काठमाण्डौं यति एयरको जहाजबाट जाँदै थिए ।

दुई वटा प्लाष्टिकको पोकामा राखेको उक्त ब्राउनसुगरसहित पक्राउ परेका रोहनमाथि आवश्यक कारबाही अगाडी बढाइएको बाँके प्रहरीले बताएकोछ ।