नेपालगन्ज २५ असोज : आसन्न मंसिर ४ गते हुन लागेको प्रतिनिधी सभा निर्वाचनका लागि बाँके क्षेत्र नम्बर–२ मा सबैभन्दा बढी उम्मेदवारी दर्ता भएको छ । यो पुर्वप्रधानमन्त्री स्वर्गिय सुशील कोइराला लड्दै आएको क्षेत्र हो ।

सोही क्षेत्रबाट संघीय सरकारका भौतिक पुर्वाधार तथा यातायात मन्त्री समेत रहेका मोहम्मद इश्तियाक राईसहित थुप्रै ब्यक्ति उम्मेदवार बनेका छन् । २०७४ सालको निर्वाचनमा निर्वाचित भएका राई यसपटक पुनः दोहोरिने दाउमा छन् । त्यतिबेला उनलाई पार्टीभित्रबाट नेता, कार्यकर्ताको राम्रो साथ थियो । तर, यसपटक जनता समाजवादी पार्टीबाट उम्मेदवारी दिएका राईलाई आफ्नै परिवारले समेत साथ दिएका छैनन् ।

जसपा बाँकेका सचिव समेत रहेका मन्त्री राईका भाई (काकाको छोरा) समशुल हक राईले सोही क्षेत्रमा उम्मेदवारी दिएका छन् । निर्वाचन अधिकृतको कार्यालयमा पुगेर आईतबार समशुलले १ नम्बरमा उम्मेदवारी दर्ता गराएका थिए । यसबाट प्रष्ट हुन्छ की मन्त्री राईलाई आफ्नै परिवार र आफन्तले नै साथ छाडेका छन् ।

यस्तै जसपाका केन्द्रिय सदस्य समेत रहेका नेता बाबु खाँ पठानले पनि बिद्रोह गरेर मन्त्री राई विरुद्ध उम्मेदवारी दर्ता गराएका छन् । जसपाबाट उम्मेदवार बन्न नपाएपछि उनले बिद्रोह गरेर मधेस केन्द्रित दल जनमत पार्टीबाट उम्मेदवारी दर्ता गराए ।

जसपाका सचिव समशुल र केन्द्रिय सदस्य खाँले संघीय निर्वाचनमा पार्टीभित्र एउटै ब्यक्तिलाई पटक–पटक उम्मेदवार बनाउन नहुने भन्दै मन्त्री राईको विरोध गर्दै आएका थिए । राईका कारण आफुहरुको राजनीति नै समाप्त हुन थालेको उनीहरुको भनाई छ । पार्टीले उम्मेदवार सिफारिस गर्दा समेत आफुहरुलाई थाहा नदिइएको उनीहरु गुनासो गर्छन् ।

केन्द्रिय सदस्य खाँले पार्टीमा रहेर आफुले उम्मेदवारी दर्ता गराउन खोज्दा हातपात भएको आरोप समेत लगाएका छन् । उक्त क्षेत्रमा २०७४ सालको निर्वाचनमा राईले गठबन्धनका उम्मेदवारलाई एक्लै पराजित गरेका थिए । नेपाली काँग्रेस र राप्रपाबीचको गठबन्धनबाट ओमप्रकाश आजाद तथा एमाले र नेकपा माओवादी केन्द्रसहितको बामगठबन्धनबाट पशुपति दयाल मिश्र उम्मेदवार थिए । राईलाई २०७४ मा जस्तो अहिले सहज छैन ।

यसपटक भने नेपाली काँग्रेसले आफ्नै उम्मेदवार खडा गरेको छ । काँग्रेसका उम्मेदवार सुदिपनरसिंह राणालाई नेकपा माओवादी केन्द्र, नेकपा एकिकृत समाजवादी र राष्ट्रिय जनमोर्चाको साथ छ । यस्तै एमाले र राप्रपाबीच यसपटक तालमेल भएको छ । राप्रपाका महामन्त्री डा. धवलसम्शेर राणालाई एमालेको समर्थन छ । यसका साथै हिन्दुवादी नेता दिवाकर खनाल पनि मुख्य प्रतिस्पर्धामा छन् ।

क्षेत्र नम्बर २ मा यस्तो छ, दलगत मत :

स्थानीय तहको निर्वाचनमा आएको परिणाम अनुसार क्षेत्र नम्बर २ मा सबैभन्दा अगाडी नेपाली काँग्रेस देखिन्छ । नेपालगन्ज उपमहानगरपालिकामा रहेका कुल २३ वटा वडा मध्ये वडा नम्बर १६ र १७ भने क्षेत्र नम्बर ३ मा पर्छन् ।

क्षेत्र नम्बर २ मा पर्ने नेपालगन्ज उपमहानगरपालिकाका बाँकी २१ वटा वडामा जसपाले ६, नेकपा एमालेले ५, नेपाली काँग्रेसले ४, माओवादी केन्द्र र राप्रपाले ३/३ वटा वडा जितेको थियो । यस्तै डुडुवा गाउँपालिकामा जसपाले ३, एमालेले २ र काँग्रेसले एउटा वडा जितेको थियो । उक्त निर्वाचनमा सबै दलबाट वडाअध्यक्षका उम्मेदवारले एक्लै प्रतिस्पर्धा गरेका थिए ।

क्षेत्र नम्बर २ अन्तरगत पर्ने नेपालगन्ज उपमहानगरपालिका र डुडुवा गाउँपालिकामा रहेका वडाअध्यक्षका उम्मेदवारले प्राप्त गरेको मत परिणाम हेर्दा कांग्रेस सबैभन्दा अगाडी छ, भने दोस्रो नम्बरमा नेकपा एमाले रहेको छ ।
यस्तै तेस्रो नम्बरमा जनता समाजवादी पार्टी (जसपा), त्यसपछि राष्ट्रिय प्रजातन्त्र पार्टी, नेकपा (माओवादी केन्द्र), नेकपा (एकिकृत समाजवादी) र लोकतान्त्रिक समाजवादी पार्टी (लोसपा) देखिएको छ । प्राप्त मत परिणाम अनुसार क्षेत्र नम्बर २ मा सबैभन्दा बढी कांग्रेसको १८ हजार ३७ मत रहेको छ ।

यसैगरी एमालेको १५ हजार ४ सय ७८, जसपाको १३ हजार ८ सय ९ र राप्रपाको ८ हजार ४ सय ९४ मत रहेको छ । नेकपा (माओवादी केन्द्र)को ६ हजार ८ सय ५९, नेकपा (एकिकृत समाजवादी)को ८ सय २१ र लोसपाको ५ सय ६४ मत रहेको छ ।

थप समाचार

कुनै पनि हालतमा म इस्तियाक राईलाई छोड्दिन : नेता समसुल हक राई

मोहम्मद इस्तियाक राईसहित ४ मन्त्रीलाई बर्खास्त गरिदैँ

एमाले र जसपाबीच सहमती : बाँकेमा एमालेको साथ धवललाई