नेपालगन्ज २८ असोज : बाँके, बर्दिया र दाङको छुट्टा छुट्टै स्थानमा भएको सडक दुर्घटनामा परि तीन जनाको मृत्यु भएकोछ ।

बाँकेको नेपालगन्ज, बर्दियाको गेरुवा गाउँपालिका र दाङको शान्तिनगर गाउँपालिकामा भएको सडक दुर्घटनामा परि पाँच वर्षीय बालकसहित तीन जनाको मृत्यु भएको हो ।

बाँकेको नेपालगन्ज उपमहानगरपालिका–१७ परसपुरमा गएराती(बिहीबार) मोटरसाइकल दुर्घटना हुँदा चालकको घटनास्थलमै मृत्यु भएको छ ।

मृत्यु हुनेमा बाँकेकै जानकी गाउँपालिका–१ का २५ वर्षीय राजेश यादब रहेका छन् ।

नेपालगन्जबाट घरतर्फ जाँदै गरेका यादबले चलाएको अनटेष्ट लेखिएको मोटरसाइकल गएराती पौने १० बजे अनियन्त्रित भइ पल्टिएको प्रहरी चौकी सााईगाउँ बाँकेले जनाएको छ ।

यस्तै, बर्दियाको गेरुवा गाउँपालिकामा ट्याक्टरको ठक्करबाट गेरुवा गाउँपालिका–४ खल्लागाउँका २५ वर्षीया नविन ठकुरीको मृत्यु भएको ईलाका प्रहरी कार्यालय, पाताभार प्रहरी निरीक्षक नीराजन सुनारले जानकारी दिए ।

कर्णाली नदीले बगाएर ल्याएका दाउरा स्थानीयले सङ्कल गरेका दाउरा बोकेर राजापुर फर्कंदै गरेको भे २ त २०९ नम्बरको ट्र्याक्टरले खोनपुर गाउँमा नविन सवार भे १० प ४४५८ नम्बरको स्कुटीलाई ठक्कर दिँदा दुर्घटना भएको थियो ।

ट्याक्टरको ठक्करबाट गम्भीर घाईते भएका ठकुरीलाई उपचारका लागि जिल्ला अस्पताल गुलरिया लैजादैँ गर्दा बाटोमै मृत्यु भएको प्रहरीले बताएकोछ । ठक्कर दिने ट्र्याक्टर र चालक सुरेश चौधरीलाई ईलाका प्रहरी कार्यालय पाताभारले नियन्त्रणमा लिएको र घटनाबारे अनुसन्धान भइरहेको प्रहरीले जनाएको छ ।

यसैगरी, दाङको शान्तिनगर गाउँपालिका–७ खैरेनीका ५ वर्षीय स्मार्ट डाँगीको मृत्यु भएको जिल्ला प्रहरी कार्यालय दाङले जनाएको छ ।

शुक्रबार बेलुकी हापुरेबाट तुलसीपुरतर्फ आउँदै गरेको रा७प ३१३१ नम्बरको मोटरसाइकले बालकलाई ठक्कर दिएको थियो ।

प्रहरीका अनुसार घाइते बालकलाई उपचारका लागि तुलसीपुरस्थित राप्ती प्रादेशिक अस्पतालमा लगिएकोमा उपचाकार क्रममा मृत्यु भएको हो । मोटरसाइकलसहित चालकलाई प्रहरीले नियन्त्रणमा लिएको छ ।