नेपालगन्ज १० भदौ : अछाममा जिल्ला समन्वय समितिका प्रमुख ललितबहादुर कुँवर र नेपाली काँग्रेस जिल्ला प्रवक्ता पदम शाहबीच कुटाकुट भएको छ ।

आईतबार राति जिल्ला समन्वय समितिको कार्यालयस्थित सरकारी निवासमा सँगै मदिरा सेवन गरेका कुँवर र शाहबीच कुटाकुट हुँदा दुईजनै घाइते भएका छन् । 

कुटपिटका क्रममा समन्वय प्रमुख कुँवरको टाउकोमा चोट लागेको छ भने शाहको हातमा चोट लागेको जिल्ला प्रहरी कार्यालय अछामले जानाएकोछ ।

पार्टीमा अन्य व्यक्ति पनि थिए । तर, कुँवर र शाहबीच कुटाकुट भएको थियो । उनीहरू दुवै काँग्रेस नेता हुन् ।

राति साढे १० बजे रक्सी खाएकै ठाउँमा कुँवर र शाहबीच कुटाकुट भएको खबर प्रहरीले पाएको थियो । प्रहरीले दुवैजनालाई नियन्त्रणमा लिएर जिल्ला अस्पताल पुराएको थियो ।

स्वास्थ्य परीक्षणमा दुवैजनाले मदिरा सेवा गरेको पाइएको जिल्ला प्रहरी कार्यालय अछामका प्रहरी नायव उपरीक्षक (डीएसपी) ईश्वरीप्रसाद भण्डारीले बताए ।

प्रहरीले दुवैजनामाथि थप अनुसन्धान गरिरहेको छ । उनका अनुसार मदिरा सेवनपश्चात् व्यक्तिगत विवाद बढ्दै जाँदा सरकारी निवासमै झगडा भएको थियो । बोलाएको बेला उपस्थित हुने शर्तमा दुवैलाई प्रहरीले छोडेको छ ।