नेपालगन्ज ८ असोज : जिल्ला प्रहरी कार्यालय बाँकेले हुण्डि कारोबारमा संलग्न दुई जनालाई नगदसहित पक्राउ गरेकोछ ।

नेपालगन्ज उपमहानगरपालिका वडा नम्बर–४ गणेशपुर स्थित मोहम्मद कादिर सिद्दिकी र सोही ठाउँका हबिब सिद्दिकीलाई १६ लाख १० हजार २५५ नेपाली रुपैयाँ र ५९ हजार ५ सय भारतीय रुपैयाँसहित प्रहरीले पक्राउ गरेको हो ।

कादिर सिद्दिकीलाई नियन्त्रणमा लिइ तलासी गर्नेक्रममा उनले बोकेको कालो झोलबाट नेपाली नौ लाख र हबिबको घरमा तलासी गर्दा उनको घरबाट सात लाख दश हजार दुइ सय पचपन्न र भारतीय रुपैयाँ ५९ हजार पाँच सय तथा विभिन्न बैंकमा विभिन्न ब्यक्तिको नाममा जम्मा गरेको बैंक भौचर, बैंकको टोकनहरु समेत प्रहरीले बरामद गरेकोछ । 

पक्राउ परेकाहरुलाई हिरासतमा राखी आवश्यक अनुसन्धान एवं कारवाही प्रक्रिया अगाडी बढाईएको बाँके प्रहरीले जनाएकोछ ।