नेपालगन्ज २० असोज : भालुबाङ–प्युठान सडक खण्डको पाँच ठाउँमा पहिरो झरेका कारण सडक अवरुद्ध भएको छ । पानी परेकाले सडकमा पहिरो झरिरहेको हो ।

वर्षाको कारण गनाह चकचके सडक खण्डस्थित अधेरी खोला, पाकुरी, सिमलचौर र खहरे खोलामा पहिरो र लेदो झरेको छ । यहाँ अहिले सडक अवरुद्ध भएको छ ।

यस्तै, चकचके खलंगा सडकखण्ड स्थित बडरामा लेदोको बाटो अवरुद्ध भएको सडक डिभिजन कार्यालय प्युठानले जनाएको छ ।

उक्त बाटोहरु सुचारु गर्न डिभिजन सडक कार्यालयले उपकरणहरु परिचालन गरेको र बाटो सुचारु गर्न प्रयास भइरहेको सिनियर डिभिजन ईञ्जिनियर विसुन दास लामाले जानकारी दिए ।

प्रदेश प्रहरी कार्यालयका अनुसार लुम्बिनी प्रदेशका अन्य जिल्लाहरुको सदरमुकाम जोड्ने सडकहरु सुचारु अवस्थामा छन् ।