नेपालगन्ज २ मंसिर : यस वर्षको मनसुनजन्य विपद्बाट झण्डै पाँच सय जनाको मृत्यु भएकोछ । 

गृह मन्त्रालय अन्तर्गतको राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार मनसुन अवधिमा यस वर्ष ४९५ जनाको मृत्यु भएको छ । भने ६६ जना बेपत्ता हुँदा ५२२ जना घाइते भएका छन् ।

गत जेठ २८ देखि असोज २६ सम्म ४ महिनाको अवधिमा मनसुनजन्य विपद्बाट १० हजार ८२२ परिवार प्रभावित भएको प्राधिकरणको तथ्यांकमा उल्लेखछ । अघिल्लो वर्षको मनसुन अवधिको तुलनामा यस वर्ष ५०० प्रतिशत बढीले मृत्यु भएको छ ।

गत वर्ष ९२ जनाको मृत्यु, ३० जना बेपत्ता र १६८ जना घाइते भएका थिए । अघिल्लो वर्ष विपद्बाट प्रत्यक्ष प्रभावित परिवार संख्या ६ हजार १२८ रहेको थियो । यस वर्ष सरकारले विपद्पछि २० जिल्लाका ७२ वटा स्थानीय तहलाई ३ महिनाका लागि विपद् संकटग्रस्त क्षेत्र घोषणा गरेको छ ।

नेपालमा जलमापन शुरु भएयताको ७७ वर्षको इतिहासमा एकैदिन सबैभन्दा धेरै वर्षा रेकर्ड भएको छ । प्राधिकरणका अनुसार कञ्चनपुरको दोधारा वर्षा मापन केन्द्रमा २४ घण्टामा ६२४ मिलिमिटर वर्षा यस वर्ष मापन भएको छ ।