नेपालगञ्ज। प्रहरीले ३ ग्राम ४५० मिलिग्राम लागू औषध (ब्राउन सुगर) सहित नेपालगञ्जबाट  ६ जनालाई नियन्त्रणमा लिएको छ।
नेपालगञ्ज उपमहानगरपालिका-१९ कन्ठिपुरस्थित चक्रे वि.क.को घरमा लागू औषधको कारोबार भइरहेको भन्ने विशेष सूचनाका आधारमा प्रहरी टोलीले छापा मारेको  थियो।
जिल्ला प्रहरी कार्यालय बाँके र लागू औषध नियन्त्रण ब्यूरो शाखा कार्यालय नेपालगञ्जको संयुक्त टोलीले असोज १२ गते चक्रे वि.क.को घरमा रितपूर्वक खानतलासी गर्दा उक्त परिमाणको ब्राउन सुगर फेला पारेको हो।  
पक्राउ पर्नेहरूमा बाँके नेपालगञ्ज-१९ का ४४ वर्षीय घनश्याम बुढामगर, ३५ वर्षीय किरण ओली, ३२ वर्षीय चक्रे वि.क. र २० वर्षीय बबिराम रोका मगर रहेका छन्। त्यसैगरी बर्दिया गुलरिया-१ का ४८ वर्षीय राजेन्द्र कुमाल र कैलाली चुरे गाउँपालिका-३ का २४ वर्षीय महेश मल्ललाई पनि प्रहरीले सोही स्थानबाट पक्राउ गरेको छ।  
प्रहरीले उनीहरूको साथबाट विभिन्न कम्पनीका ५ थान मोबाइल र नगद ७ हजार २३० रुपैयाँसमेत बरामद गरेको छ। पक्राउ परेका सबैहरूलाई नियन्त्रणमा लिएर थप अनुसन्धान भइरहेको जिल्ला प्रहरी कार्यालय बाँकेका सूचना अधिकारी प्रहरी नायव उपरीक्षक प्रतित सिंह राठौरले जानकारी दिएका छन्।