नेपालगन्ज: हतियारसहित पक्राउ परेका नेपाल तरुण दल नेपालगन्ज नगरसभापति संदिपजंग शाह रिहाईको माग गर्दै भएको बाँके बन्दकै बीच शाह विरुद्ध मुद्दा दर्तागरिएकोछ ।

ईलाका प्रहरी कार्यालय कोहलपुरले हतियारसहित पक्राउ गरेको नगरसभापति शाहसहितलाई हात हतियार खरखजाना मुद्दामा पाँच वर्ष जेल सजाय मागसहितको मुद्दा दर्ता गरेको हो ।

बाँके बन्दका बीच प्रहरीले आज शुक्रबार जिल्ला अदालतमा पाँच वर्ष जेल सजाय मागसहितको मुद्दा दर्ता गरेको जनाएकोछ ।

जिल्ला सरकारी वकिलको कार्यालय बाँकेले उक्त मुद्दा दर्ता गरेको हो । प्रहरीले रायसहितको प्रतिवेदन बुझाएपछि सरकारी वकिलको कार्यालयले उक्त रायसहितको प्रतिवेदन अध्ययन गरेर मुद्दादर्ता गरेको बुझिएकोछ ।

सोही विरोधमा तरुण दलले आज शुक्रबार बाँके जिल्ला बन्द गरेको छ । कात्तिक १४ गते पक्राउ गरिएका शाहसहित चार जनालाई मुलुकी अपराधसंहिता २०७४ को हातहतियार तथा खरखजना सम्बन्धी उक्त कसूर स्थापित हुन आएमा हातहतियार जफत गरी पाँच वर्षसम्म कैद र ५० हजार रुपैयाँसम्म जरिवाना हुने कानूनी व्यवस्था छ ।

कोहलपुर ईलाका प्रहरीले पहिलोपटक सात दिन म्याद थप गरेर कार्तिक १६ गते शनिबारदेखि सभापति शाहसँग अनुसन्धान गरेकोमा दोस्रो पटक २ दिन र तेस्रो पटक पुनः ७ दिन म्याद थपेर अनुसन्धान गरेको थियो ।