कोहलपुरः बाँकेको कोहलपुर नगरपालिका–११ स्थित कृषि हाट बजार नजिकै एक जना ब्यक्तिको शव भेटिएको छ । इलाका प्रहरी कार्यालयले बुधबार मृत अवस्थामा भेटिएका व्यक्तिको शव कुले दमाई रहेको पुष्टि गरेको छ ।

अन्दाजी ५४ वर्षका दमाई स्थायी घर सुर्खेत भई पछिल्लो समय कोहलपुर बस्दै आएको बुझिएकोछ । कोहलपुर स्थित कृषि बजार नजिकै खुला चौरमा उनी लुगा सिलाउँदै आएका थिए ।

उनको मृत्युको कारण भने अझै खुल्न नसकेको इलाका प्रहरी कार्यालय कोहलपुरका प्रहरी नायव उपरीक्षक हेमबहादुर शाही बताँउछन् ।

चौर नजिकै रहेको सानो खाडलमा डुबेको अवस्थामा दमाईको शव भेटिएको थियो । उनको स्वभाविक मृत्यु हो वा हत्या त्यो अनुसन्धानबाट खुल्छ, आजै शवको पोष्टमार्टम गरेर आफन्तको जिम्मा लगाइने प्रहरी नायब उपरीक्षक शाहले बताए ।

मृतक दमाई कोहलपुर नगरपालिका–१० ड्राइभर टोलस्थित आफ्नो दाजुसँगै बस्दै आएका थिए ।