नेपालगन्ज: प्रतिबन्धित विप्लव समुहले दैलेखको ठाटीकाँध गाउँपालिकाका अध्यक्ष धीरबहादुर शाही र उनकी श्रीमती इला शाहीलाई अपहरण गरेकाछन् ।

शनिबार राति १२ बजे २०–२५ जनाको समूहमा आएका प्रतिबन्धित विप्लव समुहले अध्यक्ष शाही र उनकी श्रीमतीलाई घरबाटै अपहरण गरेका हुन् । घरैबाट गाउँपालिका अध्यक्ष धीरबहादुर शाही र उनकी श्रीमतीलाई अपहरण गरेको विप्लव समुहले नेपाल राष्ट्रिय शिक्षक संघकी केन्द्रीय उपाध्यक्ष समेत रहेकी शाहीकी श्रीमती इला मल्ल शाहीलाई भने राति नै नजिकै जङ्गलमा छाडिदिएकाछन् ।

यद्यपी इला मल्लसँगको कुराकानीबाट गाउँपालिका अध्यक्ष शाहीलाई अपहरण गरेर कालीकोटतर्फ लगिएको जानकारी आएको छ । तर, अहिलेसम्म विप्लव समूहले भने यसको जिम्मेवारी लिइसकेको छैन ।

विप्लव समूहले अपहरण गरेको जानकारी पाएलगत्तै सुरक्षाकर्मीको टोली अहिले घटनास्थलतर्फ पुगेको छ । गाउँपालिकाको बजेट दुरुपयोग गरेको भन्दै विप्लव कार्यकर्ताले अध्यक्ष शाहीलाई पहिला नै चेतावनी पत्र दिएको थियो ।

यसअघि अध्यक्ष शाहीका भाइ हस्तबहादुर शाहीलाई विप्लव समूहले ६ महिनाअघि अपहरण गरेका थिए । तर, हस्तबहादुरलाई भने केही समयपछि नै छाडिएको थियो ।