कोहलपुर (बाँके):बाँकेको कोहलपुरबाट प्रतिबन्धित पाँचऔलेसहित एक जना पक्राउ परेकाछन् । ठूलो परिमाणमा प्रतिबन्धित पाँचऔंले जडीबुटीसहित बाँकेको कोहलपुर वडा नम्बर ११ बाट जगत ढकाल पक्राउ परेका हुन् ।

जुम्ला चन्दननाथ नगरपालिका वडा नम्बर ९ निवासी २१ वर्षीय ढकालबाट २१ किलो प्रतिबन्धित जडीबुट पाँचऔले बरामद गरिएको छ । पाँच नम्बर प्रदेश प्रहरी व्यूरोबाट प्रहरी निरीक्षक प्रमोद क्षेत्रीको नेतृत्वमा खटेको टोलीले ढकाललाई सोमवार दिउँसो २ बजे कोहलपुर नगरपालिका वडा नम्बर ११ बाट नियन्त्रणमा लिइएको हो ।

ठूलो मात्रामा प्रतिबन्धित पाँचऔंले जडिबुटि रहेको जानकारी पाएको प्रहरीले चेकजाँच गर्नेक्रममा २१ किलो पाँचऔले जडीबुटी बरामद भएको पाँच नम्बर प्रदेश प्रहरी ब्यूरोका प्रहरी निरीक्षक क्षेत्रीले जानकारी दिए ।

ब्यूरोका प्रहरी निरीक्षक क्षेत्रीका अनुसार पछिल्लो पटक ठूलोमात्रामा प्रतिबन्धित पाँचऔंले जडिबुटि सहित पक्राउ गरिएको यो पहिलो घटना हो ।
पक्राउ परेका ढकाल भरिया हुन वा प्रतिबन्धित पाँचऔंले जडिबुटिका कारोबारी हुन् भन्ने कुरा अनुसन्धानबाट खुल्ने प्रहरीले जनाएकोछ ।

पक्राउ परेको ढकालमाथि थप अनुसन्धान शुरु गरिएको प्रहरी निरीक्षक क्षेत्रीले बताए । बाँके बर्दियाका विभिन्न नाकाबाट प्रतिबन्धित जडिबुटि भारत तस्करी हुदै आएकाछन् ।