नेपालगन्ज : अपराध अनुसन्धानमा अब्बल मानिएका वडा प्रहरी कार्यालय नेपालगन्जका प्रमखु प्रहरी निरीक्षक डिल्ली बहादुर खड्काले बसबाट हराएको चार लाख रुपैयाँ पाँच दिन पछि फेला पारी सम्बन्धित ब्यक्तिलाई बुझाउन सफल भएकाछन् ।

फेला पारेको चार लाख रुपैया निरीक्षक खड्काले बाँकेका प्रहरी प्रमुख उपरीक्षक ओमबहादुर रानामार्फत पीडित राधिका विकलाई बुझाउन सफल भएका हुन ।

बाँके बैजनाथ गाउँपालिका वडा नम्बर ३ बस्ने राधिका बिक मंसिर १० गते दमराबाट बानियाँभार जाने क्रममा नगद चार लाख रुपैयाँ रहेको उनको झोला बसबाट हराएको थियो ।

चार लाख नगद सहितको झोला हराएको भनि वडा प्रहरी कार्यालय नेपालगन्जमा राधिकाले निवेदन दिए पश्चात वडा प्रहरी कार्यालय नेपालगन्जका प्रमुख प्रहरी निरीक्षक खड्का स्वयं अनुसन्धानमा खटेका थिए ।

कोहलपुर चौराहमा रहेको सिसी टिभिले कैद गरेको फुटेजबाट निरन्तर अनुसन्धान गरिरहेका प्रहरी निरीक्षक खड्काले पाँचौ दिनमा हराइरहेको रकम फेला पारेका हुन् ।

लामो समय सिआइबीमा काम गरेका निरीक्षक खड्का अपराध अनुसन्धानमा अब्बल मानिन्छन् ।