अबैध १० लाख भारतीय रुपैयाँसहित दिल्लीका मुनवर पक्राउ
नेपालगन्ज १० फागुन : भारतीय नागरिक मुनवर खान अबैध १० लाख भारतीय रुपैयाँसहित पक्राउ परेका छन् ।
जिल्ला प्रहरी कार्यालय बाँकेका प्रमुख एसपी ओमबहादुर रानाले सोमबार दिउँसो पत्रकार सम्मेलन गरी भारतको उत्तर पूर्वी दिल्ली जफ्फारावादका ५४ वर्षियका खानलाई पक्राउ गरेको जानकारी दिए ।
उनका अनुसार नेपाल–भारत सीमानाका नजिक नेपालगन्ज उपमहानगरपालिका–१६ को भन्सार चेक प्वाइन्टमा भारतबाट नेपाल पैदल आउँदै गरेका खानले बोकेका २ वटा झोलाभित्र उक्त अबैध रकम बरामद भएको हो ।
खानले बोकेको दुई वटा झोलामा २ हजारका ३ वटा र पाँच सयका एक हजार नौ सय ८८ वटा भारतीय रुपैयाँ फेला पारेको बाँके प्रहरीले जनाएको छ ।
भन्सार सुरक्षा गार्ड नेपालगन्जबाट खटिएको प्रहरी नायब निरीक्षक भिम बहादुर खड्का र सशस्त्र प्रहरी बल नेपाल बोर्डर आउट पोष्ट जमुनाह बाँकेबाट खटिएको सशस्त्र प्रहरी निरीक्षक जिवनलाल बुढाको संयुक्त सुरक्षा टोलीले आईतबार अन्दाजी साढे तीन बजे पक्राउ गरेको हो ।
प्रहरी अनुसन्धानबाट अबैधरुपमा नेपाल भित्राएको उक्त रकम पक्राउ परेका खान तामा पितलको धुलो खरिद विक्री गर्ने व्यपारी रहेको पाइएकोछ । उनले यसअघि पनि नेपालगन्जबाट नेपाली ७० हजारमा तामाका धुलो खरिद गरि भारत दिल्लीमा भारतीय ९० हजारमा विक्री गरेका छन् ।
प्रहरीले बरामद गरेको रकम मध्ये खानले ७ लाख ५० हजार दिल्लीकै तामा व्यपारी हुसनुर सहनवाजबाट तामा र पितल ल्याई दिन्छु भनि लिएको बयान दिएकाछन् ।
यस्तै एक लाख ५० हजार आफ्नै रहेको र आफन्त (साला) बाट एक लाख मागी ल्याएको बयान दिएकाछन् ।
प्रहरीले बरामद गरेको रकमले नेपालगन्ज औद्योगिक क्षेत्र भित्र रहेको लामा पितल फ्याँक्ट्रीबाट तामा र पितलको धुलो खरिद गरि लिई भारतमा खरिद मूल्यमा नाफा खाई विक्री गर्ने गरेको पाइएकोछ ।
यति ठूलो मात्रामा भारतीय (विदेशी) रकम लिई नेपालमा जाँदा केही नहुने भन्दै नेपालगन्जमा प्रहरीको फन्दामा परेको बताएकाछन् ।
विदेशी विनिमय ऐन २०१९ अनुसार यसरी बरामद गरिएको रकम जफद गरी १० लाखदेखि ३० लाख रुपैयाँसम्म जरिवाना हुने व्यवस्था छ र सोही अनुसार कारबाही प्रक्रिया अघि बढाइएको बाँके प्रहरीले बताएकोछ ।