नेपालगन्ज ९ चैत : बाँके प्रहरीले मानव बेचविखन मुद्दामा फरार एक प्रतिबादीलाई ६ वर्षपछि नियन्त्रणमा लिएकोछ ।

साविक पुरैना गाविस वडा नम्बर ९ तेलियनपुर निवासी ३२ वर्षिय अमर क्षेत्री कार्कीलाई वडा प्रहरी कार्यालय नेपालगन्जको प्रहरी टोलीले हिजो आईतबार पक्राउ गरेको हो ।

२०७१ असार २८ गते कार्कीले २० वर्षिय युवतीलाई मिठाई खान दिई बेहोस बनाएर भारतको बहराईच लगेका थिए । बहराईच पु¥याएकी ती युवतीलाई कार्कीले भारतको लखनउका नामथर थाहा नभएका एक जनालाई ५० हजार रुपैयाँमा विक्री गरेका थिए । सो घटना पश्चात कार्की फरार रहेका थिए ।

पछि २० वर्षिय ती युवतीले आफू बेचिएको भन्दै जिल्ला प्रहरी कार्यालय बाँकेमा जाहेरी समेत दिएकी थिइन् । ती युवतीको जाहेरीपछि प्रहरीको खोजीमा रहेका कार्कीलाई बाँके प्रहरीले ६ वर्षपछि पक्राउ गरेको हो ।

बाँके प्रहरीका अनुसार चालु आर्थिक वर्षको हालसम्म ५ सय ५४ जना फरार पक्राउ परेका छन् ।