नेपालगन्ज २ वैशाखः कोरोना भाइरस संक्रमणलाई मध्यनजर गर्दै नेपालगन्ज उपमहानगरपालिकाका सम्पूर्ण विद्यालयहरु आगामी आईतबारदेखि एक हप्ताका लागि बन्द गरिने भएकोछ ।

समुदायस्तरमै कोरोना भाइरस संक्रमण फैलिएपछि नेपालगन्ज उपमहानगरपालिकाको विपद् व्यवस्थापन समितिको बिहीबार अपराहन्न बसेको आपतकालिन बैठकले यस्तो निर्णय गरेको हो ।

नगरप्रमुख डाक्टर धवलशम्शेर राणाको अध्यक्षतामा बसेको बैठकले कोरोना भाइरस संक्रमणको जोखिमलाई मध्यनजर नेपालगन्ज उपमहानगरपालिकाका सम्पुर्ण शैक्षिक संस्था बन्द गर्दै जोखिम न्यूनिकरणका लागि ब्यापक तयारी समेत गरेकोछ ।

पछिल्लो समय नेपालगन्जमा कोरोना भाइरस समुदायमै फैलिसकेको यहाँका चिकित्सकसहित सरोकारवालाले बताइरहँदा कोरोनाका चेन ब्रेक गर्न नेपालगन्ज उपमहानगरपालिकाले तदारुक्ता देखाएको हो ।

बैठकले आगामी हप्ता आईतबारदेखि नगरका विद्यालय एक हप्ता बन्द गर्ने निर्णय गर्दै जिल्लाका सम्पूर्ण शैक्षिक संस्था बन्द गर्न जिल्ला संकट व्यवस्थापन केन्द्रको बैठकमा प्रस्ताव लैजाने समेत निर्णय गरेकोछ ।

उपमहानगरपालिकाको विपद् व्यवस्थापन समितिको बैठकले गरेको निर्णयका बारेमा जानकारी दिदै उपमहानगरपालिकाकी उपमेयर उमाथापा मगरले स्वास्थ्य सम्बन्धि उच्च सतर्कता अपनाउँदै माक्स विना हिड्ने सर्वसाधरणलाई जरिवाना तिराउने, माक्स र सामाजिक दूरीविना ब्यापार व्यवसाय सञ्चालन गर्नेलाई कारबाही स्वरुप एक हप्ता बन्द गराउने, नेपालगन्जमा आइसोलेसन वार्ड स्थापना गर्ने र निःशुल्क एम्बुलेन्स सञ्चालन गर्ने समेत निर्णय गरिएको जानकारी दिइन् ।

उनले माक्स तथा स्वास्थ्य सम्बन्धि मापदण्ड पुरा गरे नगरेको नियमित बजार अनुगमन समेत गर्ने निर्णय भएको बताईन् ।

सेतोखरीसंग कुरा गर्दै उपमेयर उमाले ‘भारतमा कोरोना संक्रमणको दोस्रो लहर देखिएसंगै यतिबेला भारतबाट नेपाल आउनेको संख्या बढिरहेको छ भने सोहीअनुसार उनीहरुमा कोरोना संक्रमण पनि पुष्टि भइरहेकोले जिल्लाको अवस्था झन जोखिममा नजाओस् भन्नका लागि सबै सजग र सर्तक हुनुपर्ने अपील गरिन् ।’

उनले भनिन्–‘बैठकले भारतबाट आउनेहरूको सीमा नाकामा स्वास्थ्य तथा एन्टिजेन परीक्षणका लागि थप कडाइ गर्ने निर्णय गरेको छ । परीक्षण दर बढाउन प्रदेश र केन्द्र सरकारसंग पहल गर्ने निर्णय भएकोछ ।’