पाल्पा ३० साउन : स्याल मार्न बाबुले चलाएको गोली लागि आफ्नै छोराको मृत्यु भएकोछ । यो घटना पाल्पाको हो ।

पाल्पाको रिब्दिकोट गाउँपालिका– ६ ठिमुरेस्थित तल्लोताल टोलका ५६ वर्षीय कर्णबहादुर लम्तरीले मकैबारीमा आएको स्याललाई धपाउन प्रहार गरेको भरुवा बन्दुको छर्रा लागेर उनका ३५ वर्षीय छोरा धनबहादुर लम्तरीको मृत्यु भएको हो ।

शुक्रबार साँझ मकैबारीमा स्याल धपाउन बन्दुक प्रहार गर्दा धनबहादुरको टाउकोमा छर्रा लागेको प्रहरीको भनाई छ ।

घर नजिकैको मकैबारीमा आएको स्याललाई ताकेर भरुवा बन्दुक पड्काउने क्रममा करिब १०० मिटर पर रहेका आफ्नै छोराको टाउकोमा छर्रा लागेर मृत्यु भएको पाल्पाका प्रहरी प्रवक्ता डिएसपी रामेश्वर त्वातीले जानकारी दिए ।

भरुवा बन्दुकसहित कर्णबहादुरलाई नियन्त्रणमा लिई अनुसन्धान भइरहेको डिएसपी त्वातीले बताए ।