नेपालगन्ज ११ असोज : विराटनगरका लागि उडेको बुद्ध एयरको जहाज त्रिभुवन विमानस्थलमा फोर्स ल्यान्डिङ गराइएको छ ।

सोमबार विहान विराटनगर विमानस्थलमा अवतरण हुन नसकेपछि पुनः काठमाडौं फर्किएको बुद्ध एयरको जहाज सुरक्षित अवतण भएको बुद्ध एयरले जनाएको छ ।

बुद्ध एयरको जहाज विराटनगर विमानस्थलमा अवतरण हुन लाग्दा समस्या देखिएको थियो । जहाजको ल्याण्डिङ गियरमा समस्या देखिएको बताइएको छ ।

त्रिभुवन विमानस्थलमा फोर्स ल्यान्डिङ गराइएपछि बुद्ध एयरको ७०१ विमानमा चालक दलका सदस्यसहित ७७ जना सुरक्षित रहेका छन् । ४ जना चालक दलका सदस्य रहेको विमानमा ७३ यात्रु थिए जसमा २ बालबालिका र ३ शिशु रहेका थिए ।

विराटनगरमा अवतरण गर्ने क्रममा ल्याण्डिङ गियरमा समस्या देखिएपछि विमान काठमाडौं फर्काइएको थियो । समस्या देखिएपछि काठमाडौंको आकाशमा आधा घण्टा होल्ड भएको बुद्ध एयरले जनाएको छ ।

समस्या पहिचान भएसँगै चालकले १० बजेर २१ मिनेटमा विमान सकुशल अवतरण गरिएको र यात्रुहरु सुरक्षित रहेको बुद्ध एयरले जनाएको छ ।