नेपालगन्ज २६ असोज : बर्दियाको गेरुवा गाउँपालिकामा बाघले एक जनालाई खाएकोछ ।

बाघको आक्रमणबाट गेरुवा गाउँपालिका वडा नम्बर–४ ढुकुनियाका ४० वर्षीय जनकबहादुर थारुलाई बाघले खाएको हो ।

सोमबार दिउँसो गेरुवा गाउँपालिका–४ ढुकुनियामा नदी किनारमा भैँसीलाई पानी खुवाउन जाँदा उनलाई बाघले आक्रमण गरेको थियो ।

प्रत्यक्षदर्शीका अनुसार उनलाई बाघले घिसार्दै जंगलमा लगेको थियो । खोजी गर्ने क्रममा गएराति साढे ११ बजे उनको शव गेरुवा गाउँपालिकाको गोर क्षेत्रमा फेला परेको थियो ।

पछिल्लो समय बाँके र बर्दियामा बाघ आक्रमणको घटना ह्वात्तै बढ्दै गएकोछ । बाँके र बर्दिया राष्ट्रिय निकुञ्ज आसपासका क्षेत्रमा बाघको चहलपहल बढ्नुका साथै बाघ आक्रमणको घटनाले निकुञ्ज आसपास क्षेत्रका स्थानीयबासी जोखिममा परेकाछन् ।

यतिमात्र होइन केही समय अघि मात्रै दाङको रिहारदेखि अमिलियातर्फको पूर्वपश्चिम सडक क्षेत्रमा चितुवा र बाघको एक समुह नै फेला परेपछि बाँके, बर्दिया र दाङमा चितुवा र बाघको जोखिम बढेको हो ।