नेपालगन्ज ३ कार्तिक : मनसुन बाहिरिएपछिको अविरल वर्षापछि आएको बाढी, पहिरो र डुबानमा परी देशभर ३० जनाको मृत्यु भएको छ ।

वर्षाजन्य विपदबाट विभिन्न जिल्लाका ३३ जना सम्पर्कविहीन रहेको गृह मन्त्रालयको राष्ट्रिय आपतकालीन कार्य सञ्चालन केन्द्रले जनाएको छ ।

मंगलबार रातिदेखि बुधबार बिहान १० बजेसम्म प्राप्त जानकारी अनुसार बाढी, पहिरो र डुवानमा परि ३० जनाको मृत्यु भइसकेकोछ । भने ३२ जना बेपत्ता र १२ जना घाइते रहेको केन्द्रले जनाएको छ ।

विभिन्न जिल्लामा फसेका नौ जनाको हेलिकप्टरबाट उद्धार गरिएको छ । स्थलमार्गबाट समेत उद्धार कार्य जारी रहेको र अहिलेसम्म कञ्चनपुरलगायत जिल्लाबाट ७ सय जनालाई उद्धार गरी सुरक्षित ठाउँमा पु¥याइएको गृह मन्त्रालयले जनाएको छ ।

प्राप्त विवरणमा बाढी पहिरो र डुबानबाट मुलुकका १९ जिल्ला प्रभावित भएको छ । त्यसमध्ये १५ जिल्लाका अधिकांश राजमार्ग तथा धेरै ठाउँमा विद्युत् र फोन सेवासमेत अवरुद्ध भएको छ । यसअघि सोमबार आएको बाढी, पहिरोमा ६ जनाको मृत्यु भएको गृह मन्त्रालयमा रिपोर्टिङ भएको थियो ।