बर्दिया १८ पुष : भारतीय जङ्गलबाट आएको हात्तीको आक्रमणमा परि बर्दियामा एक महिलाको मृत्यु भएकोछ ।

बर्दियाको राजापुर नगरपालिका निवासी ५४ वर्षीया भुसिया थारुलाई भारतीय जङ्गलबाट आएको हात्तीले आक्रमण गर्दा मृत्यु भएको प्रहरीले जनाएको छ । भारतीय जंगलबाट आएका हात्तीले भुसियालाई आक्रमण गरेको बताइएको छ ।

जिल्ला प्रहरी कार्यालय बर्दियाका प्रवक्ता डिएसपी हेमबहादुर शाहीले भारतीय जङ्गलबाट आएको हात्तीको आक्रमणबाट ती महिलाको मृत्यु भएको बताए । उनका अनुसार मृतक भुसिया नेपाल–भारत सीमा नजिक बाख्रा चराउन गएको बेलामा हात्तीले एक्कासी आक्रमण गरेको थियो ।

केही दिनयता उक्त क्षेत्रमा हात्तीले आतंक मच्चाएपछि स्थानीय बासिन्दा त्रसित बनेका छन् । जङ्गली हात्तीले कतिबेला आएर आक्रमण गर्ने हो भन्नेमा उनीहरु निकै आतंकित भइरहेको प्रहरीले बताएको छ । हात्तीको आतंक बढिरहँदा पनि स्थानीय प्रहरी प्रशासनले बेवास्ता गरिरहेको सर्बसाधारणको गुनासो छ ।