अगैया(बाँके) २७ पुष : चोरी गरेको ५ वटा मोवाईलसहित एकजना भारतीय नागरिकलाई राप्तीसोनारी–२ अगैया बजारबाट प्रहरीले नियन्त्रणमा लिएको छ । भारत श्रावस्ती जिल्ला घर बताउने अन्दाजी ३० वर्षिया बाबुलाल पासवानलाई प्रहरी चौकी अगैयाले मङ्गलबार बेलुका ८ बजेतिर नियन्त्रणमा लिएको हो ।

मोवाईल चार्ज गर्ने बहानामा अगैयाका विभिन्न पसलमा प्रवेश गर्ने र मौका छोपेर पसलधनीको मोवाईल लुकाएर लग्ने गरेको जानकारी पाएपछि चेक जाँच गर्दा पासवानको खल्तीमा ५ वटा मोवाईल फेला परेको प्रहरी चौकी अगैयाका ईन्चार्ज प्रहरी सहायक निरीक्षक खगेन्द्र केसीले जानकारी दिए ।

नियन्त्रणमा लिईएका पासवानसँगै अर्का एक जना बुद्धिलाल पासवान पनि मोवाईल चोरीमा संलग्न रहेको र उनी अगैयाकै एकजना महिलाको मोवाईल चोरेर भागीसकेको ईन्चार्ज केसीले बताए ।

‘बाबुलालसँग रहेका मोवाईलको सीम फालीसके अवस्थामा फेला परेको छ’ ईन्चार्ज केसीले भने –‘सीम फाल्नु अगाडि मिसकल आएको नम्बरमा कलब्याक गर्दा प्युठानको केटीले फोन उठाइन् र आफ्नो मोवाईल चोरी भएको बताईन् ।’

मोवाईल चोरी गर्ने गिरोह प्यूठानको स्वर्गद्वारी हुँदै अगैया आएको हुनसक्ने प्रहरीको आशंका छ । नियन्त्रणमा लिइएका पासवानलाई थप अनुसन्धान तथा कारबाहीका लागि ईलाका प्रहरी कार्यालय कोहलपुर पठाईएको ईन्चार्ज केसीले बताए ।