नेपालगन्ज ६ माघ : मौसममा आएको परिर्वतनले बिहीबार विहानैदेखि नेपालगन्जको मौसम अनुकुल थिएन । आकाशमा लागेको बाक्लो बादलका कारण भिजिविलिटी क्लियर थिएन ।

घरीघरी भइरहेको सिसिम वर्षा र क्लियर भिजिविलिटी नहुँदा काठमाडौंबाट नेपालगन्ज उडेको बुद्ध एयरको जहाज अवतरण हुन झण्डै ३५ मिनेट लाग्यो ।

निर्धारित समयमै काठमाण्डौंबाट ६९ जना यात्रु लिएर नेपालगन्ज पुगको बुद्ध एयरको जहाज नेपालगन्ज विमानस्थलमा अवतरण गर्न नसक्दा आकाशै ‘होल्ड’मा प¥यो । सोही अवधिमा विमानमै रहेकी एक यात्रु बेहोस भइन् ।

काठमाडौंबाट ७ः४४ मा उडेको बुद्ध एयरको उडान नं ४५१ को जहाज निर्धारित समयअनुसार ८ः४४ मा नेपालगन्ज विमानस्थलमा अवतरण हुनुपर्ने थियो । तर, नेपालगन्ज विमानस्थलको मौसम अनुकुल नभएपछि जहाज आकाशमै होल्डमा प¥यो । अन्ततः यो जहाज बिहान ९ः१८ मा सकुसल अवतरण भयो ।

सो क्रममा काठमाण्डौबाट नेपालगन्ज आएकी जानुका थापा बेहोस भइन् । बुद्ध एयर नेपालगन्जका व्यवस्थापक प्रमुख विनित शाहका अनुसार निर्धारित समयमै जहाज अवतरण हुननसक्दा अत्तालिएर उनी बेहोस भएकी हुन् ।

नेपालगन्ज विमानस्थलमा जहाज अवतरण गरेलगत्तै जानुकालाई बुद्ध एयरको एम्बुलेन्सबाटै नेपाली सेनाको ईमामनगर ब्यारेक राँझा स्थित नेपाल आर्मीको अस्पतालमा लगिएको थियो ।

अस्पतालमा सामान्य उपचारपछि उनी निको भएर फर्किसकेको बद्ध एयर नेपालगन्जका ब्यवस्थापक प्रमुख शाहले बताए । उडान सुचारु हुन कम्तिमा पनि १६०० देखि २००० मिटर सम्मको भिजिबिलिटी आवश्यक पर्छ ।

यसैबीच, खराब मौसमका कारण देशभरका आन्तरिक हवाई उडानहरु प्रभावित भएका छन् ।