नेपालगन्ज १३ माघः सामाजिक सञ्जालको बढ्दो दुरुपयोग नियन्त्रणका लागि सरकारले कडा कदम चालेकोछ ।

ब्यक्तिलाई जानकारी नदिई वा ब्यक्तिलाई कुनै पनि प्रकारले गलत तथा दोहोरो अर्थ आउने गरि श्रब्य, दृष्य कैद गरि उनीहरुको सहमतिबिना सार्वजनिक गरिने ‘प्राङ्क’ तस्विर र भिडियो खिच्ने वा बनाएर सार्वजनिक गर्नेलाई काबारहीको दायरामा ल्याइने भएकोछ ।

गृह मन्त्रालयले ‘प्राङ्क’ का नाममा सम्बन्धित व्यक्तिको सहमतिबिना कुनै प्रकारको तस्बिर र भिडियो खिच्न तथा तिनलाई सामाजिक सञ्जालमा प्रकाशन गरेमा कारबाही हुने चेतावनी समेत दिएको छ । पहिलोपटक गृह मन्त्रालयले यस्तो गतिविधि रोक्न सार्वजनिक चेतावनी दिएको हो ।

मन्त्रालयले बिहीबार एक सूचना जारी गरी यस्ता तस्विर र भिडियो बनाएर निजलाई जानकारी नै नदिई सामाजिक सञ्जालमा प्रकाशन, प्रशारण गर्ने जोसुकैलाई प्रचलित कानूनबमोजिम कारबाही हुने जनाएको हो ।

सार्वजनिकस्थलमा ख्यालठट्टाका नाममा गोप्यरूपमा भिडियो तयार गरी तिनलाई सामाजिक सञ्जालमा राख्ने गरिएको गुनासो प्राप्त भएको मन्त्रालयका सहसचिव तथा प्रवक्ता फणिन्द्रमणी पोखरेलद्वारा जारी गरिएको विज्ञप्तिमा उल्लेख छ ।

यस्तो कार्यले सर्वसाधारणलाई शारीरिक तथा मानसिक सास्ती दिने भन्दै यस्तो गतिविधि नगर्न गृहमन्त्रालयले सम्बद्ध सबैलाई सचेत गराएको छ ।

‘सार्वजनिकस्थलमा गरिएका भद्दा ख्यालठट्टाबाट पीडित व्यक्तिमा मानसिक तनाव उत्पन्न हुनसक्ने, वादविवाद र द्वन्द्व तथा सामाजिक सद्भाव एवं शान्ति सुव्यवस्थामा पर्नसक्ने नकारात्मक प्रभावका साथै व्यक्तिगत गोपनीयता र प्रतिष्ठामा पर्नसक्ने असरलाई दृष्टिगत गरी व्यक्तिको अनुमतिबिना व्यक्तिको तस्बिर र भिडियो नखिच्न तथा तिनलाई सामाजिक सञ्जालमा प्रकाशन नगर्न अनुरोध छ’ विज्ञप्तिमा भनिएको छ ।

पछिल्लो समय ‘प्राङ्क’ का नाममा मानिसहरुलाई दुःख दिने मात्र नभई गोपनीयता समेत उल्लंघन गर्ने कार्य मौलाइरहेको छ । कतिपयले ‘प्राङ्क’ भन्दै अश्लिल भिडियोसमेत बनाएर युट्यूवमा पोष्ट गर्ने गरेका छन् ।