नेपालगन्ज ५ जेठ : नेपालगन्ज उपमहानगरपालिका वडा नम्बर १८ पशुपतिनगर निवासी उमेश सुनारले आफ्नी छोरीको हत्या गरेको भन्दै प्रहरीले किटानी जाहेरी लिन नमानेको पीडित परिवारले बताएकाछन् ।

गत वैशाख २९ गते रोल्पा जिल्लाको सुनछहारी गाउँपालिका वडा नम्बर–४ मा पर्ने झर्ना क्षेत्रमा चन्द्रा सुनार मृत अवस्थामा भेटिएकी थिइन् । आफ्नै श्रीमान उमेशसँग रहेकी चन्द्राको मृत्युले उनको हत्या गरि दुर्घटना देखाउन खोजेको भन्दै चन्द्राकी माईती पक्षले शुक्रबार नेपालगन्जमा पत्रकार सम्मेलन गर्दै यस्तो दावि गरेका हुन् ।

चन्द्राकी श्रीमा उमेशले उनको हत्या गरेर दुर्घटना देखाउन खोजेको भन्दै चन्द्राकी आमा सानु सुनारले दोषीलाई कारबाहीको माग गरिन् । छोरी चन्द्राको हत्यापछि प्रहरीले किटानी जाहेरी दर्ता गर्न नमानेपछि न्याय पाउनका लागि बाध्य भएर पत्रकार सम्मेलन गरेको सानुले बताइन् ।

पत्रकार सम्मेलन छोरीको स्वभाविक मृत्यु नभई योजनाबद्ध हत्या भएको र हत्याको मुख्य दोषी नै उनका श्रीमान उमेश रहेको दावि गर्दै चन्द्राकी आमा सानुले दोषी उमेशलाई कानूनी कारबाहीको गरि न्यायको माग राखिन् ।

बाँके खजुरा गाउँपालिका वडा नम्बर –४ निवासी २७ वर्षीया चन्द्राको २०७० सालमा नेपालगन्ज वडा नम्बर –१८ पशुपतिनगर निवासी उमेश सुनारसँग प्रेम विवाह भएको थियो । उमेश नेपाल प्रहरीका प्रहरी जवान हुन् । उनीहरुको ४ वर्षीय एक छोरा समेत छन् ।

विवाह पश्चात उमेश र चन्द्राबीचको बैवाहिक सम्बन्ध त्यती राम्रो नभएको सुनाउँदै चन्द्राकी आमा सानुले भनिन्–‘कामका शिलसिलामा आफूहरु भारतबाट ४ महिना अघि मात्र नेपाल आएका थियौ । छोरी सधैं निरास र दुखि देखिन्थि ।’

सानुले अगाडी थपिन्–‘उमेशले छोरी चन्द्रालाई टर्चर दिने गरेको, परस्त्रीसँग हेलमेल रहेको, दाईजो नदिएको, छोरो र श्रीमतीसँग अभिभावकी जिम्मेवारीबाट पन्छिने गरेका थिए । माइत समेत आउजाउ गर्न रोक लगाएका थिए । छोरीलाई भेट्न बोलाएर हत्या गरेर दुर्घटना देखाउन खोजियो ।’

चन्द्राको मृत्यु भएको खबर पाए लगत्तै बाँकेबाट रोल्पा स्थित सुनछहारी गाउँपालिका पुग्दा छोरीको अवस्था दर्दनाक थियो । घटनाका बारेमा जानकारी दिदैँ सानुले अगाडी सुनाईन्–‘झरनाको पोखरीमा चन्द्रा डुवेर मरेको भनियो तर, त्यहाँ चन्द्राको कम्मरमुनीको कुनै वस्त्र थिएन । छातिमाथि भित्रि वस्त्र थियो । छोरीको योनाङ्ग र मलद्वारमा रगतका छिट्टा थिए । घाउ थियो । घाँटी, ढाड र अनुहारमा चोट लागेको थियो । वियरका बोतल र ‘यौन उत्तेजना’ बृद्धि गर्ने औषधिको खोस्टा थिए ।’

आमा सानुले भनिन्–‘पानीमा डुवेर मृत्यु हुने मान्छे यो अवस्थामा कसरी पुग्यो । चन्द्राका श्रीमान उमेशले छोरीलाई नेपालगन्जदेखि रोल्पा बोलाएर बलात्कार गरि हत्या गरे । अहिले हत्यालाई दुर्घटना सावित गरिदैँछ ।’

जिल्ला प्रहरी कार्यालय कोवाङ्गमा कार्यरत उमेशले प्रहरी प्रशासनको बलमा घटनालाई दुर्घटनामा परिणत गरे । प्रहरीले समेत साथ दिएन । उमेश विरुद्ध प्रहरीकोमा किटानी जाहेरी दिन खोज्दा प्रहरीले उल्टै धम्कि दिएर किटानी जाहेरी दर्ता गर्न मानेन’ चन्द्राकी आमा सानुले रुदैँ पत्रकार सम्मेलनमा घटनाबारे प्रष्ट्याइन् ।

उमेशले छोरी चन्द्रालाई रोल्पा बोलाउँदा त्यहाँ जान इनकार गरेपनि सासुससुराको दवावमा बाध्य भएर गएको बताउँदै आमा सानुले ससुरा भक्तबहादुर सुनारले नै मोटरसाईकलमा राखेर रोल्पा जाने बसमा चढाएर फर्केको बताइन् ।

मृतक चन्द्राकी बहिनी नितु सुनारले दिदी चन्द्राको हत्या भएको दावि गर्दै निष्पक्ष छानविन गरि दोषी उमेशलाई कानूनी कटघेरामा ल्याउन माग गरिन् ।

नितुले भनिन्–‘एकातिर आफ्नो दिदीको विभत्स हत्या भएको छ, अर्कोतिर न्याया माग्न खोज्दा प्रहरी प्रशासनले समेत असहयोग गरिरहेकोछ । किटानी जाहेरीसमेत दर्ता गर्न मान्दैन प्रहरी । न्यायका लागि काहाँ जाऔं ।’
‘दिदि(चन्द्रा)ले घरपरिवार र श्रीमानबाट दुख पाइरहेको सुनाउथि । मलाई राम्रो छैन । राम्रो व्यवहार गर्दैनन् । आज दिदीको हत्या भयो’ बहिनी नितुले भनिन् ।

यस्तै चन्द्राकी फुपुकी छोरी सृजना सुनारले उमेशले नै चन्द्राको हत्या गरेको दावि गरिन् । प्रहरीमा रहेका उमेशको आनीबानी राम्रो थिएन । धेरैपटक परस्त्रीसँगको साँठगाँठले चन्द्रा र उमेशबीच झगडा समेत हुने गरेको थियो । चन्द्रालाई वेवास्ता गर्थे उमेशले आज हत्या गरेर दुर्घटना देखाउन खोजियो ।

चन्द्राका हजुरबुवा देवमल सुनारले नातीनीको हत्यारा उमेशलाई पक्राउ गरि कानूनी कारबाही गर्न माग राखे । उनले भने–‘नातीनि चन्द्राको हत्या गर्ने उमेश कार्यारत प्रहरी कार्यालयबाट अनुसन्धान भइरहेकोछ । प्रहरीको मिलोमतोमा घटना ढाकछोप गरिदैँछ ।’

हजुरबुवा देवमलले भने–‘नातनीको शब बुझाउँदा माइती पक्ष कसैको सहभागिता गराइएन । हत्या गर्ने गरि उनले मानिसको आउजाउ नुहुने एकान्तमा लगेर मारे ।’

नातनी चन्द्रा र उनका ४ वर्षीय छोरा विहान सुनारसँग झरनामा गए । चन्द्रा डुब्दा थाहा नभएको, आफै छोरा विहानसँग खेलिरहेको र श्रीमती डुबेर मरेको थाहा पाएपछि प्रहरीलाई खबर गरेर बोलाएको भन्ने झुठा बयान उमेशले दिएको हजुरबुवा देवमलले दावि गरे ।

नातनी चन्द्राको हत्या भएको दावि गर्दै उनका श्रीमानले नै चन्द्रालाई मारेको उनीहरुको दावि छ । चन्द्राको हत्या गर्ने उमेशलाई कारबाही नगरिए पीडित परिवारले चरणबद्ध आन्दोलन गर्ने चेतावनी समेत पत्रकार सम्मेलनमाफर्त दिएकाछन् ।

बाँके खजुरा गाउँपालिका वडा नम्बर–४ ई गाउँ निवासी सानु सुनारको ५ छोरी र एक छोरा छन् । चन्द्रा परिवारकी जेठी छोरी हुन् ।