नेपालगन्ज ४ भदौ : कोरोना भाइरस संक्रमणले आक्रान्त बनाइरहेका बेला नेपालगन्ज विमानस्थलले ३ करोड बढी बचत गर्न सफल भएकोछ ।

नेपालगन्ज विमानस्थलले आर्थिक वर्ष २०७७/७८ मा ३ करोड २ लाख बचत गर्न सफल भएको हो । देशभर रहेका ५४ मध्ये ४३ विमानस्थल घाटामा जाँदा नेपालगन्ज विमानस्थलले बचत गर्दै उदाहरणीय कार्य अघि सारेको छ ।

नेपालगन्ज विमान स्थलले ५ करोड ४७ लाख आम्दानी गरेकोमा कुल खर्च २ करोड ४५ लाख कटाएर ३ करोड २ लाख बचत गरेको हो ।

नेपालगन्ज विमानस्थलसँगै धनगढी, सुर्खेत, जुम्ला, सिमिकोट, रारा र बाजुरा विमानस्थलले पनि आर्थिक वर्ष २०७७÷०७८ मा आम्दानी गरेका छन् ।

विमान स्थलको तथ्यांक अनुसार धनगढी विमानस्थलले एक करोड ६४ लाख ७ हजार, सुर्खेत विमानस्थलले २ लाख ८५ हजार, जुम्ला विमानस्थलले ५ लाख १५ हजार बचत गरेको छ ।

यसैगरि सिमकोट विमानस्थलले २३ लाख ९८ हजार बचत गरेको छ । बाजुरा विमानस्थलले ६ लाख ८८ हजार बचत गर्दा रारा विमानस्थलले २७ लाख ४८ हजार बचत गर्न सफल भएको छ ।

डोल्पा, साँफेबगर र डोटी विमानस्थल भने घाटामा गएका छन् । डोल्पा विमानस्थल १३ लाख ८९ हजार, सांफेबगर विमानस्थल ४ लाख ९१ हजार ७ सय र डोटी विमानस्थल २ लाख ३१ हजार घाटामा गएका छन् ।