निर्मला डाँगी

नेपालगन्ज ९ असोज : भारतबाट भन्सार छलेर अबैध रुपमा ल्याएको राँगालाई प्रहरीले नियन्त्रणमा लिएको छ ।

नेपालगन्ज उपमहानगरपालिका वडा नम्बर– १ मा भारतबाट अबैध रुपमा राँगा ल्याइरहेको भन्ने विशेष सूचनाको आधारमा प्रहरीले फेला पारी नियन्त्रणमा लिएको हो ।

जिल्ला प्रहरी कार्यालयबाट खटिएको प्रहरी टोलीले चेक जाँच गर्दा अन्दाजी एक लाख ५० हजार मुल्य बराबरको ६ जिउ राँगा नियन्त्रणमा लिइएको प्रहरी नायव उपरीक्षक एवम् प्रवक्ता मधुसुधन न्यौपानेले जानकारी दिए ।
बेवारिसे अवस्थामा रहेका उक्त राँगा नियन्त्रणमा लिई आवश्यक कारवाहीका लागि नेपालगन्ज भन्सार कार्यालयमा बुझाइएको उनले बताए ।

यसअघि पनि असोज १ गते बाँके प्रहरीले भारतबाट अबैधरुपमा नेपाल भित्र्याईएको ४ वटा जिउँदो रागाँ नियन्त्रणमा लिएको थियो ।

नेपालगन्ज उपमहानगरपालिका वडा नम्बर १२, कोरियनपुर नजिक बेवारिसे अवस्थामा रहेका ती राँगा नियन्त्रणमा लिई आवश्यक कारबाहीका लागि नेपालगन्ज भन्सार कार्यालय पठाएको थियो । चाडबाड नजिकिएसंगै अबैध सामान ओसारपसार पनि बढ्दोछ ।

दशैंको मुखमा नेपाल–भारत सीमा नाका हुँदै अबैध रुपमा राँगा तस्करी हुने क्रम बढेको सीमा क्षेत्रका स्थानीय बताउँछन् । रागाँ तस्करी बढेपनि प्रहरीले राँगा तस्करलाई समाउन सकेको छैन ।