मंगलबार, मंसिर २१, २०७८   १२:२७:०७

चाडबाडमा वर्षेनी सडक ‘कब्जा’ गरेर ब्यापार, सरोकारवाला तैँचुप मैँचुप


नेपालगन्ज १७ कार्तिकः नेपालीहरुको दोस्रो ठूलो चाड तिहार भित्रिएसँगै नेपालगन्जको मुख्य व्यापारिक केन्द्र सदरलाईन बजारमा सेवाग्राहीको चाप ठेलमठेल छ ।

कोरोना भाइरस कहरकैबीच पछिल्ला दुई दिनमा सेवाग्राहीको चाप उल्लेख्य रुपमा बढ्दै गएको व्यवसायीहरुले बताएका छन् । यतिबेला नेपालगन्ज बजार तिहारका सामग्रीहरुको प्रदर्शनीले झकिझकाउ बनेको छ ।

विशेष गरि नेपालगन्जको व्यस्त सदरलाईन बजारको बीच सडकमै ठेला, टेबुल राखेर व्यापारीहरुले भाडावर्तन, फलफूल, भाइमसाला, रंगोलीलगायतका सामग्रीहरु बिक्रीवितरण गर्न थालेपछि सेवाग्राहीहरुलाई हिँड्नै सकस भएको छ । यो समस्या भने नेपालगन्जका लागि नयाँ र नौलो होइन । वर्षेनी चाडबाडमा यसरी नै नेपालगन्जको सडक कब्जा हुने गर्छ ।

अझ सडकपेटीमा नै बसेर फुटपाथ पसल राखेर व्यापार गर्दा त्रिभुवन चोकदेखि उत्तरतर्फ त्रिवेणी मोडसम्मको सडकमा आवजाउमा सर्वसाधरणले सास्ती भोग्दै आएकाछन् । व्यस्त बजारमा सडकको बीच भागमा पसल थापेर गरिएको व्यापारले ट्राफिक जाम समेत भएकोछ । जसका कारण पैदल यात्रुहरुलाई समेत आवतजावतमा हम्मेहम्मे परेकोछ ।

कोभिडका कारण व्यापार नहुँदा निराश बनेका व्यवसायीहरुलाई उपभोक्ताको बाक्लो उपस्थितीले राहत महसुस भएपनि चाडपर्वको मौका पारेर फुटपाथ व्यवसायीहरुले सडक कब्जा गरि र सडकपेटीमा नै सामान राखेर बिक्री गरिरहेका छन्, अव्यवस्थित व्यापार व्यवस्थापनका लागि भने नेपालगन्ज उद्योग वाणिज्य संघ मौन रहदै आएकोछ ।

यसअघि सडकपेटी र सडक कब्जा गरेर गरिने व्यापार व्यवसायलाई व्यवस्थापन गर्ने भन्दै नेपालगन्ज उद्योग बाणिज्य संघले उद्घोष गर्दै प्रतिवद्धता समेत ब्यक्त गरेको थियो । तर, संघको उद्घोष र प्रतिवद्धता व्यवहारमा कार्यान्वयन अझैं हुन सकेको छैन ।

नेपालगन्ज उपमहानगरपालिका र नेपालगन्ज उद्योग वाणिज्य संघको गैरजिम्मेवारीका कारण वर्षेनी सर्वसाधरणले सास्ती भोग्नुपरेको हो ।

चाडपर्वअघि फुटपाथ व्यवसाय सञ्चालन गर्न कडाइ गर्ने नेपालगन्ज उपमहानगरपालिका, जिल्ला ट्राफिक प्रहरी कार्यालय यतिबेला तैचुपमैचुप छ । यसअघि अव्यवस्थित फुटपाथ हटाउनका लागि नगर प्रहरीहरु बिहानदेखि बेलुकासम्म परिचालन गरिन्थे ।

नेपालगन्जमा दशैं, तिहार, तीज, होली, ईद, बकरिद, छठ पर्व लगायतका चाडबाडमा स्थानीय ब्यवसायीहरुले उक्त सडक यसरी नै कब्जा गरेर ब्यापार गर्दै आएका छन् । यसले सो सडक भएर आवतजावत गर्ने सर्वसाधरणलाई सास्ती हुनेगरेकोछ । तर, पनि स्थानीय प्रशासन, उद्योग बाणिज्य संघ र नेपालगन्ज उपमहानगरापालिकाले यस्ता चाडबाडमा खोलिने ब्यापार ब्यवसायको दीर्घकालिन ब्यवस्थापनमा खासै चासो नदिदाँ स्थानीय ब्यापारीहरु सडकमै ब्यापार गर्न बाध्य छन् ।

सम्बन्धित निकायले यसअघि पटक–पटक चाडबाडको बेला गरिने यस्ता पसल निश्चित स्थानमा सञ्चालन गर्ने प्रतिबद्धता जनाएपनि अहिलेसम्म उक्त प्रतिबद्धता अनुसार ब्यवसायीको व्यवस्थापन हुन सकेको छैन । सडक कब्जा गर्नुको विकल्प ती ब्यापारीसंग नभएको स्थानीय जानकार बताउँछन् ।