नेपालगन्ज २४ वैशाखः केही महिनादेखि लगातार लागेको ढडेलोले बाँकेको ५ हजार १ सय ३३ हेक्टर क्षेत्रफल सखाप बनाएकोछ ।

बाँकेका विभिन्न सामुदायिक वन र चक्ला वन क्षेत्रमा केही महिनादेखी डढेलो लागिरहेको छ । बाँकेको नरैनापुर, राप्तीसोनारी, कोहलपुर र बैजनाथ लगायत क्षेत्रमा डढेलो लागेको हो ।

डिभिजन वन कार्यालय बाँकेले दिएको जानकारी अनुसार कोहलपुर सव डिभिजनका २२, सिक्टा सव डिभिजनमा पर्ने १८, नेपालगन्ज सव–डिभिजन कार्यालय अन्तरगतका १०, नरैनापुर सव डिभिजन अन्तरगतका ९, राप्तीसोनारी सव डिभिजनमा पर्ने ४ र शम्शेरगन्ज सव डिभिजन अन्तरगतको एउटा चक्ला वनसहित गरी कूल ७६ सामुदायिक वनमा डढेलो लागेको छ ।

यो पनि पढ्नुहोस् बाँकेका सामुदायिक वनमा डढेलो, वन्यजन्तु सङ्कटमा

सहायक वन अधिकृत वीरेन्द्र रोकाले अधिकांश स्थानमा डढेलो नियन्त्रणमा आइसकेको बताए । डढेलो लागेको वनमा ७ सय लिटर ट्यांकी भएको अग्नि नियन्त्रक गाडीमार्फत आगो निभाइएको उनले सुनाए । 

डढेलो नियन्त्रण गर्न चक्ला वनमा ३० किलोमिटर र विभिन्न सामुदायिक वनमा २० किलोमिटर अग्निरेखा निर्माण गरिएको छ । लामो समयको सुक्खा खडेरी, जङ्गलमा मौवा टिप्न जाने बहानामा र चरिचरण गर्न जानेहरुको लापरवाहीका कारण डढेलो लागेको आशंका गरिएको छ ।

डढेलोका कारण बाँकेमा कुनै मानवीय क्षती नभएपनि वन्यजन्तु तथा चराचुरुङ्गिको बासस्थान तथा चरिचरण क्षेत्र नष्ट हुनुका साथै केही वन्यजन्तु र चराचुरुङ्गि मरेको आँकलन गरिएकोछ । यद्यपी यसको एकिन तथ्यांक भने अझैँ संकलन भएको छैन ।