नेपालगन्ज : सुर्खेत जाँदै गरेको पूर्वराज्यमन्त्री सवार गाडी दुर्घटनामा परेकोछ ।

सोमबार दिउँसो बर्दियाको बाँसगढी नगरपालिका–१, मौरीखोला र उन्तिसखोलाको बीचमा उक्त गाडी दुर्घटना भएको हो । दुर्घटनामा परि गाडीमा सवार पाँचजा घाइते भएका छन् ।

पूर्वजलस्रोत राज्यमन्त्री विनोदकुमार शाह सवार बा २१ च ४७४६ नम्बरको गाडी सोमबार दिउँसो बर्दियाको बाँसगढी नगरपालिका–१, मौरीखोला र उन्तिसखोलाको बीचमा दुर्घटना भएको थियो ।

दुर्घटनामा पूर्वराज्यमन्त्री साहसहित उनकी श्रीमती लक्ष्मी शाह, विन्द्रासैनी नगरपालिका–२ दैलेखका सूर्यबहादुर शाही, आठबिस नगरपालिकाका पदम माझी र चालक विनय भण्डारी घाईते भएको प्रहरीले जनाएको छ ।

चालक भण्डारीको कोहलपुर मेडिकल कलेजमा र पूर्वराज्यमन्त्री शाहसहित अरू चार जनाको नेपालगन्ज नर्सिङ होममा उपचार भइरहेको जिल्ला प्रहरी कार्यालय बाँकेले जनाएकोछ ।

प्रहरीका अनुसार घाइतेहरूको अवस्था खतरामुक्त रहेको छ । गाडी सडकदेखि ६० मिटर तल खसेको थियो ।