गुलरिया(बार्दिया) १ भदौ : बर्दिया राष्ट्रिय निकुञ्जको चेपाङग मध्यवर्ती क्षेत्र अन्तर्गत पर्ने सुर्खेतको भेरीगंगा नगरपालिकामा दुईजनाको ज्यान लिने पाटेबाघलाई नियन्त्रणमा लिइएको छ । दुई जना मानिसलाई खाएर ‘डकार्न’ नपाउँदै उक्त पाटेबाघलाई नियन्त्रणमा लिइएको हो ।

भेरीगंगा नगरपालिका वडा नम्बर–५ गेरुवनी स्थित शक्ति मध्यवर्ती सामुदायिक वन क्षेत्रमा सोहि स्थानका ४६ वर्षिय रामबहादुर चन्द र ६७ वर्षिय कवि ओली घाँस काट्न गएका बेला साउन २९ गते दिउँसो बाघले आक्रमण गरी ज्यान लिएको थियो ।

लामो समयसम्म दुवै जना घर नफर्किएपछि खोजी गर्दै जाँदा चन्द र ओली आईतबार मृत अवस्थामा भेटिएका थिए ।

निकुञ्ज कार्यालयका कर्मचारी, राष्ट्रिय प्रकृति संरक्षण कोष बर्दियाबाट खटिगएको टोलीले भदौ १ गते दिउसो सल्यानको कालिमाटि गाँउपालिका वडा नम्बर–७ स्वामीबास वन क्षेत्रबाट उक्त बाघलाई नियन्त्रणमा लिइएको बर्दिया राष्ट्रिय निकुञ्जका प्रमुख संरक्षण अधिकृत विष्णु श्रेष्ठले जानकारी दिए ।

नियन्त्रणमा लिइएको सो पाटेबाघालाई बाँके राष्ट्रिय निकुञ्ज कार्यालयको खैरी पोष्ट नजिक रहेको खोरमा सुरक्षित राखिएको छ । सो बाघ करिब १२ वर्षको भएको बताइएको छ । बाघलाई बाँके निकुञ्जमा छोडिने भएको छ ।