अष्ट्रेलिया २८ साउन : नेपालगन्ज न्यूरोड स्थित एक सपिङ् पसलमा भएको आगलागी रहस्यमय आगलागी बनेको छ । भवितव्य आगलागी नभइ आफैले आगो लगाए जस्तो विभिन्न तथ्य प्रमाणहरुले देखाएपछि उक्त आगलागी रहस्यमय बनेको हो ।

मिति २०८१ साउन २ गते राती नेपालगन्ज न्यूरोडमा रहेको एसक्युज मी फेशन वेयरमा आगलागी भएको थियो । आगलागीबाट सबै मालसामान जलेका छन् । 

एसक्युज मी फेसन वेयरमा आगो लागेको हो की आगो लगाइएको हो भन्ने बारे सेतोखरी डटकमसँग थुप्रै प्रमाणहरु आइपुगेका छन् । यद्यपी उक्त पसलका सञ्चालक गाविन्द साहुले एसक्युज मी फेशन वेयरमा २०८१ साउन २ गते मध्ये राती विद्युत सर्किट भई आगलागी भएर पूर्ण रुपमा क्षती भएको भन्दै वीमा दावीका लागि २०८१ साउन ३ गते वीमा कम्पनीमा निवेदन दिएका छन् । 

रातीको १२ बजेर १५ मिनेट ३० सेकण्ड जाँदा दुईजना ब्यक्ति एसक्युज मी फेसन वेयरमा पसलमा प्रवेश गर्दै ।

पसल जलेपछि पसल सञ्चालक गोविन्दले इन्स्योरेन्स कम्पनीसँग पौने एक करोड दावी भुक्तानी माग गरेका छन् । पसल जलेपश्चात पसल सञ्चालकले भुक्तानीका लागि रकम माग दावी गरेपछि उक्त रकम भुक्ततानी गर्न इन्स्योरेन्स कम्पनीले क्षतीको विवरण संकलन तथा अनुसन्धान थालेपछि आगलागी रहस्यमय देखिएको हो ।

सेतोखरीलाई प्राप्त थुप्रै प्रमाणहरु केलाउँदा आगलागी नभई वीमा रकम दावी भुक्तानी गर्नका लागि आगो लगाए जस्तो देखिन्छ । यस बिषयमा सेतोखरीले थप अनुसन्धान गरी रहेको छ ।

पसल सञ्चालक गोविन्दले एसक्युज मी फेशन वेयरको वीमा सानिमा जिआइसी इन्स्योरेन्स लिबाट गरेका छन् । उनको पसलको वीमा लेख न. ००९/०२/९०२०००७०/२३/२४ रहेको छ । 

सेतोखरीलाई प्राप्त वीमाका कागजात अनुसार, सानिमा जिआइसी इन्स्योरेन्स लिमा एसक्युज मी फेशन वेयरको मिति २०८० कात्तिक ३ गते ३३ लाखको वीमा गरिएको छ ।

रातीको १२ बजेर २७ मिनेटमा एक जना ब्यक्ति हातमा झोला लिएर पसलबाट बाहिर निस्कदैँ ।

त्यसैगरी सञ्चालक गोविन्दले फेरी मिति २०८१ जेठ १७ गते ४२ लाखको वीमा थपेका छन् । उनको एनएमबी बैंक कारकाँदो शाखा नेपालगन्जमा ऋण रहेको देखिन्छ । उनले एसक्युज मी फेशन वेयरको नाममा जम्मा ७५ लाखको वीमा गरेको देखिन्छ । उक्त पसलको वीमा २०८१ असोज ३ गते राती १२ बजे सकिन्छ । वीमा अवधि सकिन २ महिना बाँकी रहँदा एसक्युज मी फेशन वेयरमा आगलागी हुन पुग्छ ।

सानिमा जिआइसी इन्स्योरेन्स लिले उक्त आगलागी रहस्यमय र शंकास्पद रहेको सेतोखरीसँग भनेको छ । पसल संचालक गोविन्दले इन्स्योरेन्स समक्ष आफु पसल बन्द गरेर ८ बजे नै घर गएको बताएका छन् ।

आगलागी र केही तथ्य 

नेपालगन्ज उपनगरपालिका वडा नम्बर–२ न्यूरोडमा अवस्थित घरधनी सतनाम कौरको घरमा गोविन्दले एसक्युज मी फेशन वेयर खोलेका थिए । घरधनी कौर त्यहाँ बस्दैनन् ।
मिति २०८१ साउन २ गते मध्य राति गोविन्दको एसक्युज मी फेशन वेयरमा आगलागी हुन्छ । सडकमा हिँड्ने कसैले आगो लागेको धुँवा निस्किरहेको देख्छन् र आगलागी भयो बाहिर निस्क भन्दै जोडले चिच्याउन थाल्छन् । 

माथिल्लो तलामा भाडामा बस्ने व्यक्तिहरु बाहिर सडकमा आउँछन् र पसलमा आगो लागेको भन्दै पसलधनी, दमकल अनि प्रहरीलाई खबर गर्छन् । दमकल, वरिपरिका छिमेकी प्रहरी सबैको सक्रियतामा आगो निभाइन्छ ।

पसलधनी गोविन्दले विद्युत सर्किटले पसलमा आगलागी भएको सबैलाई बताउँछन् । तर, सेतोखरीलाई प्राप्त प्रमाण अनुसार, आगलागी आफै नलागी लगाएको जस्तो देखिन्छ । 
२०८१ साउन २ गते रातको १२ बजिसकेको हुन्छ । मध्यरात भइसकेकाले सबै निदाइसकेका हुन्छन् । 

रातीको १२ बजेर १५ मिनेट ३० सेकेण्डमा २ जना व्यक्ति गोविन्दको एसक्युज मी फेशन वेयर भित्र प्रवेश गर्छन् । 

रातीको १२ बजेर २८ मिनेट ३० सेकेण्ड जाँदा फेरि दुई जना ब्यक्ति पसलबाट बाहिर निस्केर विपरित दिशातिर जाँदै ।

प्रवेश गरेको १२ मिनेटपछि अर्थात १२ बजेर २७ मिनेटमा १ जना व्यक्ति हातमा झोला समातेर बाहिर निस्कन्छन् र जान्छन् । 

ती व्यक्ति निस्केको १ मिनेट ३० सेकेण्ड अर्थात १२ बजेर २८ मिनेट ३० सेकेण्डमा फेरी २ जना व्यक्ति पसलबाट बाहिर निस्केर फरक–फरक दिशातर्फ जान्छन् ।

अनि १२ बजेर ३२ मिनेट १३ सेकेण्डमा आगलागी भएको धुँवा बाहिर निस्किएको देखिन्छ । अर्थात ती २ जना व्यक्ति बाहिर निस्किएको ३ मिनेट ४३ सेकेण्डपछि पसलमा आगलागी भएको धुँवा बाहिर निस्कन्छ ।

रातीको १२ बजे २ जना व्यक्ति किन पसलभित्र पसे त ? केही छिनमै किन निस्किए त ? उनीहरु निस्किएको ४ मिनेट भित्र नै आगो किन लाग्यो ? यस आगलागीको अनुत्तरित प्रश्न छन् ।

सबै तथ्यहरु केलाउँदा के देखिन्छ भने १ जना व्यक्ति पहिलेदेखि नै पसलमा रहेको र २ जना व्यक्ति भित्र गएर ३ जना मिली आगो लगाएर पालैपालो बाहिर आएको हुन सक्ने देखिन्छ । किनभने पसलबाट ती व्यक्तिहरु निस्केर गएको ४ मिनेटभित्र आगो लागेको छ । 

समाचारमा फोटो मात्र राखिएको छ यस सम्बन्धि भिडियोहरु सेतोखरीसँग सुरक्षित रहेको छ ।