बर्दिया ४ चैत : बर्दिया राष्ट्रिय निकुञ्जले मान्छे खाने बाघको पहिचान गर्न नसके पनि घरपालुवा जनावर खाने बाघको पहिचान गरी नियन्त्रणमा लिएको छ । बर्दिया राष्ट्रिय निकुञ्जको मध्यवर्ती क्षेत्रमा पर्ने गेरुवा गाउँपालिका क्षेत्रबाट उक्त पाटेबाघलाई नियन्त्रणमा लिइएको हो ।

चालु आर्थिक वर्षमा ९ जना मानिसको बाघ आक्रमणबाट मृत्यु भैसकेको अवस्थामा मान्छे खाने बाघको पहिचान हुन सकेको छैन । यद्यपी निकुञ्जको उत्तरी पश्चिम भागमा घरपालुवा जनावहरुलाई आफ्नो शिकार बनाएको बाघलाई ‘डार्ट’ गरि नियन्त्रणमा लिइएको छ ।

बर्दिया राष्ट्रिय निकुञ्जका सहायक संरक्षण अधिकृत एंवम सूचना अधिकारी असिम थापाका अनुसार पाटेबाघ नियन्त्रणमा लिन निकुञ्ज, नेपाली सेनाको टोली र प्रहरीको संयुक्त टिमले क्यामरा जडान गरी ट्रयाकिङ कार्य गरेको थियो ।

सोहि अनुसार हात्तिको सहयोगमा बुधबार बेलुका नियन्त्रणमा लिइएको निकुञ्जका सहायक संरक्षण अधिकृत एवम सूचना अधिकारी थापाले सेतोखरीलाई जानकारी दिए ।
नियन्त्रणमा लिइएको उक्त पाटेबाघ करिब १५ वर्षको भएको बुझिएको छ । भने बाघका नङग्रा कमजोर हुनुका साथै केहि झरेको तथा मुख्य दाँत पनि नरहेको उनले बताए । बुढो कमजोर बाघ नियन्त्रणमा लिएको निकुञ्जले बर्दियामा मानिस मार्ने बाघको भने अझैँ पहिचान हुन सकिरहेको छैन ।

‘डार्ट’ गरि नियन्त्रणमा लिएको पाटेबाघलाई निकुञ्ज मुख्यालय ठाकुरद्वारा राखिएकोछ ।

बर्दिया राष्ट्रिय निकुञ्जमा निउरो टिप्न गएका तीन महिलामध्ये ठाकुरबाबा नगरपालिका ७ की ५५ वर्षीय डल्ली रावतलाई (हिजो) मङ्गलबार दिउँसो पाटेबाघले झम्टेर लगेपछि उनको खोजी गर्दा निकुञ्जको बघौरा फाँटमा शव भेटिएको थियो ।

बर्दिया राष्ट्रिय निकुञ्ज र आसपास क्षेत्रमा पाटेबाघको आक्रमणबाट यो वर्ष मात्रै ९ जनाको ज्यान गइसकेको छ । पछिल्लो समय बर्दियामा बाघ आक्रमणका घटना बढ्न थालेपछि स्थानीयबासी त्रसित बनेका छन् ।

बाघ आक्रमणका घट्ना बढ्दैगएपछि निकुञ्ज तथा डिभिजन वन कार्यालयले सूचना जारी गर्दै निकुञ्ज तथा डिभिजन वन र सामुदायिक वनमा गाइभैँसी चराउन तथा घाँस दाउरा लिन नजान पटकपटक आग्रह गरेपनि स्थानीयले अटेर गरेपछि बाघको आक्रमणबाट ज्यान गुमाउनेको संख्या बढिरहेको छ ।

यसअघि पनि गत कार्तिक २४ गते बर्दियाको गेरुवा क्षेत्रबाट मान्छे खाने एउटा पाटेबाघ निकुञ्जको टोलीले ‘डार्ट’ गरि नियन्त्रणमा लिइसकेको छ ।

निकुञ्जद्वारा पर्यटकलाई जङ्गलमा हिँडडुल गर्न रोक

पाटेबाघले आक्रमण गर्ने डर बढेसँगै बर्दिया राष्ट्रिय निकुञ्जमा पर्यटकलाई जङ्गलमा हिँडडुल गर्न रोक लगाइएको छ ।

केही महिनादेखि पाटेबाघको आक्रमण बढेको भन्दै निकुञ्जले विज्ञप्ति निकालेर निकुञ्जमा सञ्चालन भइरहेका पर्यटकीय गतिविधिमध्ये ‘जङ्गल वाक’ गर्न बन्द गरिएको जानकारी गराएको हो ।