बर्दिया २५ माघ : बर्दियाको जयनगर बजारमा आईतबार बेलुकी अटोको ठक्करबाट मृत्यु भएकी महिलाका आफन्तलाई बारबर्दिया नगरपालिकाले आर्थिक सहयोग गर्ने भएको छ । बारबर्दिया नगरपालिकाका नगर प्रमुख दुर्गाबहादुर थारु ‘कविर’ले मृतकका परिवार तथा स्थानीयबासीहरुसंगको छलफलमा यस्तो बताएका हुन् ।

मृतकका परिवारलाई नगरपालिकाको कार्यपालिकाको बैठकबाट क्षतिपुर्ति दिने भन्दै नगरप्रमुख थारुले आश्वासन दिएका हुन् ।

मृतक तथा स्थानीयबासीहरुले प्रहरी कार्यालयमा क्षतिपुर्तिको बारेमा छलफल गरिरहेका बेला नगर उपप्रमुखले हस्तक्षेप गरेको भन्दै आक्रोसित मृतकका आफन्त तथा स्थानीयबासीहरुले नगरपालिका कार्यालयको मुल गेटमा ताल्चा लगाएर विरोध प्रर्दशन गरेका थिए ।

स्थानीयबासी सुभाष परियारले मृतकक परिवारलाई क्षतिपुर्ति दिने विषयमा छलफल भैरहेका बेला नगर उपप्रमुखले हस्तक्षेप गरी पीडकको पक्षमा वकालत गरेपछि मृतकका आफन्त तथा स्थानीयबासीहरुले नगरपालिकामा तालाबन्दी गरी विरोध प्रर्दशन गरेको बताए ।

स्थानीयबासीहरुले नगरपालिकाको मुल गेटमा ताल्चा लगाउँदै मुल गेटमै टायर बालेर विरोध प्रर्दशन गरेका थिए ।

बारबर्दिया नगरपालिका वडा नम्बर– ६ जयनगर बजारमा भे १ ह ४६३१ नम्वरको अटोरिक्साले आईतबार बेलुकी करिब ७ बजेतिर ठक्कर दिँदा बारबर्दिया नगरपालिका वडा नम्बर– ८ घर भई हाल वडा नम्बर–६ जयनगर बजार निवासी ३० वर्षिय मुना भट्राइको मृत्यु भएको थियो ।

अटो चालक सोही नगरपालिकाका ३४ वर्षिय रामप्रसाद थारुलाई प्रहरीले पक्राउ गरेको छ । प्रहरीका अनुसार थारुले मापसे गरेर अटो चलाएका थिए ।