डुडुवा (बाँके) ४ पुस : आर्थिक वर्ष सुरु भएको पाँच महिनापछि डुडुवा गाउँपालिकाले सोमबार आफ्नो १२ औं गाउँसभा गरेको छ । सभामा चालु आर्थिक वर्ष २०७९/८० का लागि नीति तथा कार्यक्रम र बजेट प्रस्तुत गरिएको छ ।

गाउँपालिकाको आज सोमबार बसेको १२औं गाउँसभाले एक वटा विधयक, नीति तथा कार्यक्रम र रु ६५ करोड ३१ लाख ९३ हजारको प्रस्तावित बजेट सार्वजनिक गरेको हो ।

जस अनुसार पूर्वाधार विकासतर्फ (गाउँपालिका) १४ करोड ४६ लाख, पुर्वाधार विकास (वडातर्फ) ३ करोड, चालू कार्यक्रम खर्च १४ करोड २४ लाख ५३ हजार र सशर्त अनुदान २४ करोड २० लाख ४० हजार, आर्थिक विकासमा १ करोड ५० लाख, सामाजिक विकासमा ५ करोड ६५ लाख, वन वातावरण र विपद व्यवस्थापनतर्फ ४२ लाख, संस्थागत विकास र सेवा प्रवाहमा १ करोड ८४ लाख रुपैयाँको बजेट रहेको छ ।

गाउँपालिका अध्यक्ष नरेन्द्रकुमार चौधरीले शिक्षा, स्वास्थ्य, कृषि, पशु, स्वरोजगार, विपत, वन तथा बातावरण, विकास निमार्ण लगायतका १८ बुंदे महत्वपूर्ण निती तथा कार्यक्रम प्रस्तुत गरे ।

कन्या मुद्दती शिक्षा योजना, संस्कृत भाषा, अवधी भाषा र उर्दू भाषाको संरक्षण र संर्वद्धनको लागि मातृभाषाका गुरु/शिक्षक÷सहजकर्तामार्फत मातृभाषाको संरक्षण र विकासमा जोड, एसईई उत्तीर्ण डुडुवा गाउँपालिकाका सबै छात्राहरुलाई प्रति छात्रा एउटा साइकल प्रदान गरी थप अध्ययनको लागि प्रोत्साहित, बाल उद्यानको स्थापना, तलाउ तथा पोखरीको संरक्षण, पिकनिक स्पटको निर्माण, राप्ती नदी र डुडुवा खोलामा डुंगा तथा ¥याफ्टिङ्ग संचालन तथा प्राचिन मठ, मन्दिर, गुम्वा, चर्च, मस्जिद एवं गुरुद्वाराहरुको संरक्षण, मर्मत संभार तथा पुर्ननिर्माण गरी पर्यटकीय क्षेत्रहरुका विकास, राप्ती नदी किनारमा स्नानघर र आर्यघाट व्यवस्थितरूपमा संचालन गर्न आवश्यक भौतिक पूर्वाधार निर्माण, आवधिक योजना, क्षेत्रगत योजना, रणनीतिक योजना र गुरु योजना कार्यान्वयन मार्फत गाउँपालिकाको समग्र विकास, घरघरमा डुडुवा सरकारको अवधारणा कार्यान्वयन गर्न घर–घर स्वास्थ्य कार्यक्रम, जेष्ठ नागरीकसँग गाउँपालिका अध्यक्ष कार्यक्रम, घरघर पशुसेवा कार्यक्रम, वडा वडामा प्रयोगाशाला सुविधा, टोलटोलमा घटनादर्ता अभियान र मालपोत संकलन अभियानलाई निरन्तरता निति तथा कार्यक्रम प्रस्तुत गरिएको हो ।

यसैगरि ‘ग’ र ‘घ’ वर्गका अशक्त अपांगहरुलाई त्रैमासिक रुपमा सामाजिक सुरक्षा भत्ता, गाउँपालिकाको वनकट्टीमा नवनिर्मित प्रशासनिक भवनबाट सेवा प्रावाहलाई नियमित सहज, सूचना प्रविधिमैत्री, अशक्तमैत्री र सेवाग्राहीमैत्री, भूमिहिन सुकुमबासी तथा अब्यवस्थित बस्तीलाई प्रचालित भूमि ऐन बमोजिम कार्य प्रक्रिया अगाडी बढाउने, बाढी र डुवानको उच्च जोखिममा रहेको वस्तीहरुमा तटबन्धनको व्यवस्था, डुडुवा गाउँपालिक वडा नम्बर–६ महाउत टोलमा सात सय मेटिक टन क्षमताको कोल्ड स्टोर निर्माण चालु आव मै सम्पन्न गरि किसानहरुको आलु विउ भण्डारण र तरकारी तथा फलफूल भण्डारण आत्मनिर्भरमा बनाईनेछ ।

साथै डुडुवा–२ मा स्थापना भएको बिउ भण्डारण तथा प्रशोधन केन्द्रलाई संचालन, पशुपती मावि नौरीगौडीमा गापा स्तरीय क्याम्पस स्थापनाको लागी जग्गा प्राप्तीको आवश्यक प्रवन्ध गरिनेछ । यस्तै डुडुवामा रहेका सबै सामुदायिक बिद्यालयहरु र बालविकास केन्द्रहरुमा अग्रेजी माध्यमबाट पाठपाठन सिकाई कार्यमा जोड दिनेछ ।

प्रयोगशाला नभएका वडाहरु वडा नम्बर–१, ३ र ४ मा क्रमशः प्रयोगशाला स्थापना गरिनेछ र न्यूनतम दरमा सवै डुडुवावासीहरुलाई वडास्तरमा स्वास्थ्य परीक्षणको पहुचमा वृद्धि गरिनेछ ।

कृषि बालीमा लाग्ने रोग किरा नियन्त्रण गर्न आवश्यक विषादी निःशुल्क रुपमा वितरण कार्यलाई निरन्तरता, कृषिको उत्पादन क्षेत्र विस्तार गर्न अन्य निकायसमेतको सहकार्यमा सिंचित क्षेत्रमा विस्तार गरिनेछ । उन्नत पशु स्रोत केन्द्रको विकास गर्न कृत्रि गर्भाधान कार्यक्रमबाट नश्ल सुधार गरि कृषकको आम्दानीमा वृद्धि गर्ने लगायत रहेको छ ।

सभामा डुडुवा गाउँपालिकाको आर्थिक विधियेक २०७९ प्रस्तुत गरिएको थियो । सोमबार प्रस्तुत नीति तथा कार्यक्रम र बजेटमाथी थप छलफल गर्न भोली मंगलबार दिउँसो पुन बैठक बस्ने गाउँपालिका अध्यक्ष चौधरीले बताए ।

गाउँसभा सचिव तथा प्रमुख प्रशासकीय अधिकृत कृष्णप्रसाद पौडेलले संचालन गरेको सभामा गाउँपालिका उपाध्यक्ष शाहिदा बानो, वडाध्यक्षहरु पटेश्वरी कुर्मी, दुर्गाप्रसाद बर्मा, आमोद तिवारी, सगिर खाँ, झंकबहादुर थापा र मोहनराम मिश्र, सम्पूर्ण वडासदस्य, कार्यपालिका सदस्य लगायत सबैको सहभागिता रहेको थियो ।

यसअघि बहुमतको दम्भमा नेकपा एमाले र जसपाको विरोधका कारण गाउँसभा पटकपटक स्थगित हुँदै आएको थियो । आर्थिक वर्ष सुरु भएको पाँच महिनापछि डुडुवा गाउँपालिकाले सोमबार आफ्नो १२ औं गाउँसभा गरेको हो । यसअघि समयमा गाउँसभा नहुँदा सबै सेवा ठप्प भएका थिए ।

थप समाचार

हिउँदे अधिवेशन गर्ने समयमा डुडुवाको गाउँसभा बस्दै

एमाले र जसपाको दम्भ टुट्यो, डुडुवामा लागेको ताला खुल्यो

कर्मचारीद्वारा डुडुवामा तालाबन्दी, सेवा थप प्रभावित

डुडुवामा एमाले र जसपाको दादागिरी : चार महिनादेखि अबरुद्ध गाउँपालिकाको सेवा प्रवाहबारे अधिकारकर्मीको चासो